નવસારીનાં ચીખલીથી ફડવેલ જતી મીની બસ સાથે ઉમરકુઈ જતી બસ વચ્ચે અકસ્માત થતાં મીની બસનાં ચાલકનું સારવાર દરમિયાન મોત નિપજ્યું હતું. જોકે બસમાં 25 જેટલા મુસાફરોને સામાન્ય ઇજા થતાં ચીખલી રેફરલ હોસ્પિટલ ખસેડવામાં આવ્યા હતા. સુત્રો પાસેથી મળતી માહિતી મુજબ, ચીખલી ફડવેલ ગામનાં વળાંક પાસે આવેલા એક ઝાડને કારણે અકસ્માત થયાનું સ્થાનિકો દ્વારા ચર્ચાઈ રહ્યું છે. જેમાં વહેલી સવારે 6થી 6.30ની વચ્ચે ચીખલીથી ફડવેલ જતી મીની બસ સાથે ઉમરકુઈ જતી મોટી બસ સામસામે ભટકાઈ હતી.

જોકે ધડાકાભેર બંને બસ સામસામે અથડાતા બંને બસનો ખુરદો બોલી ગયો હતો. જેમાં મીની બસનાં ચાલક વિજય નારણ આહીરનો પગ કેબિનમાં ચગદાઈ ગયો હતો જેને ટ્રેકટર વડે બહાર કાઢી સારવાર અર્થે ખસેડતા મોત નીપજ્યું હતું. જયારે બંને બસ અથડાતા બસમાં સવાર 25 જેટલા મુસાફરોને સામાન્ય ઇજા થઈ હતી સ્થાનિક ગ્રામજનોએ તાત્કાલિક 108 દ્વારા સારવાર અર્થે ખસેડવામાં આવ્યા હતા. ઘટના અંગે ચીખલી પોલીસ અકસ્માતની તપાસ શરૂ કરી હતી.