બીલીમોરા ખાડા માર્કેટ નજીક વિઠ્ઠલનગર સોસાયટીમાંથી 6 બંધ મકાનને નિશાન બનાવતા ચકચાર મચી હતી. જેમાં બે મકાનોનાં તાળા તોડી તેમજ ચાર મકાનોમાં બારી ગ્રીલ કાઢી ચોરીને અંજામ આપ્યો હતો અને 10 ગ્રામ ચાંદીનો સિક્કો, વાસણ, કપડાં ચોરી ફરાર થઈ ગયા હતા. મળતી માહિતી મુજબ, બીલીમોરા પશ્ચિમે એસ.વી. પટેલ માર્ગ ઉપર ખાડા શાકભાજી માર્કેટ નજીક વિઠ્ઠલનગર સોસાયટી આવેલી છે જેમાં 6 બંધ મકાનોમાં રાત્રે તસ્કરોએ કસબ અજમાવ્યો હતો અને હાથ ફેરો કરી જતા ચકચાર મચી હતી.

જોકે મકાનો બંધ હોવાથી કેટલાની ચોરી થઈ તેની વિગતો પ્રાપ્ત નથી. બે મકાનોનાં તાળા તૂટ્યા હતા જેમાં પ્રવેશી તસ્કરોએ 10 ગ્રામ ચાંદીનો સિક્કો, વાસણ અને કપડાં ચોરીને અંજામ આપ્યો હતો. જ્યારે બીજા મકાનમાંથી અગત્યનાં દસ્તાવેજો અને ઘડીયાળની ચોરી થઈ હતી. જે અંગે પોલીસમાં લેખિત જાણ કરાઈ હતી. જ્યારે અન્ય ચાર મકાનોમાં બારીની ગ્રીલ કાઢી તસ્કરો પ્રવેશ્યા હતા. ભરચક વસ્તી ધરાવતી સોસાયટીમાં એક સાથે 6 મકાનોને નિશાન બનાવતા લોકોમાં દહેશત વ્યાપી હતી જયારે પોલીસ રાત્રી પેટ્રોલિંગમાં વધારો કરે એ પણ જરૂરી બન્યું છે.