નવસારી હાઈવે રોડના બોરીયાચ ટોલનાકા પાસેથી રૂરલ પોલીસે બીનવારસી હાલતમાં રોડપર પાર્ક કરાયેલ આઇસર ટેમ્પો માંથી રૂપિયા 10 લાખથી વધુ કિંમતના ઇંગ્લિશ દારૂ અને ટેમ્પો મળી રૂપિયા 18 લાખનો મુદ્દામાલ કબ્જે કર્યો હતો. નવસારી રૂરલ પોલીસ સ્ટેશનનાં પી.આઈ.નાં માર્ગદર્શન હેઠળ સર્વેલન્સ સ્ટાફ ઇંગ્લિશ દારૂની હેરાફેરી અટકાવવા માટે પેટ્રોલીંગમાં હતા.

તે વખતે બાતમી મળી હતી કે, હાઈવે રોડના બોરીયાચ ટોલનાકા પાસે રોડ ઉપર ઇંગ્લિશ દારૂ ભરેલ ટેમ્પો બીનવારસી હાલતમાં પાર્ક કરાયો છે. જેને લઈને પોલીસ સ્ટાફે ટોલનાકા પાસે મુંબઈથી અમદાવાદ જતા ટ્રેક ઉપર પાર્ક કરેલ ગુજરાત પાર્સિંગના આઇસર ટેમ્પોની તલાસી લેતા પુઠાના બોક્સની આડમાં લઈ જવાતા રૂપિયા 10 લાખથી વધુનો ઇંગ્લિશ દારૂ અને ટેમ્પો મળી રૂપિયા 18 લાખનો મુદ્દામાલ કબ્જે કરી ટેમ્પો નંબરનાં આધારે અજાણ્યા ઇસમો સામે પ્રોહિબીશન એક્ટનો ગુનો દાખલ કરી આગળની કાર્યવાહી હાથ ધરી હતી.