નર્મદાનાં દેડિયાપાડા તાલુકાનાં ગારદા ગામે દીપડાએ વાછરડીનું મારણ કરતાં સ્થાનિક લોકોમાં ભયનો માહોલ જોવા મળી રહયો છે. જોકે દીપડાનાં ભયના કારણે લોકો ઘરની બહાર નીકળતા પણ ગભરાય રહયાં છે અને પશુઓને કઈ રીતે બચાવું તે મોટો પ્રશ્ન આવીને ઉભો થયો છે. મળતી માહિતી મુજબ, ગારદા ગામનાં મુકેશ વસાવાની સાડા ચાર વર્ષની વાછરડી ત્રણ દિવસ પહેલા જ એમના મિત્ર જીવરાજને ભાગે આપી હતી.

જયારે ગતરોજ વહેલી સવારે દોઢ વાગ્યાની સુમારે ઘરની બહાર વાડામાં બાંધેલા પશુઓનો અવાજ આવતા જીવરાજભાઈ રાશલભાઈ વસાવાએ બેટરી મારતાં જોયું તો એક દીપડાએ વાછરડીનું મારણ કર્યું હતું અને જેવી દીપડા પર બેટરી પડી દીપડો ત્યાંથી ફરાર થઈ ગયો હતો. દીપડાનાં આતંકથી ગારદા ગામનાં પશુપાલકોમાં ભારે ભયનો માહોલ ફેલાયો છે. આ ઘટના બાદ પશુપાલક મુકેશ વસાવાએ વન વિભાગનાં કર્મચારીઓને જાણ કરતા સવારે વન વિભાગનો કાફલો અને પશુ ડોકટરો સહિત ઘટના સ્થળે દોડી આવ્યા હતા. (ફાઈલ ફોટો)