નર્મદાનાં તિલકવાડા તાલુકાનાં ઊંચાદ ગામનાં યુવકને પત્નીએ ઠપકો આપતાં તેણે ઝેરી દવા પી લેતાં આત્મહત્યા કરી હતી. મળતી માહિતી અનુસાર, હિરલબેન અલ્પેશભાઇ લક્ષ્મણભાઇ તડવી (હાલ રહે. ઉચાદ ગામ, તા.તિલકવાડા, જિ.નર્મદા. મુળ રહે.ટંકારી ગામ, તા.નાંદોદ, જિ.નર્મદા) નાંએ પોલીસને જાણ કર્યા મુજબ તેમના પતિ અલ્પેશભાઇ લક્ષ્મણભાઇ તડવી (ઉ.વ.24., રહે.ટંકારી ગામ, તા.નાંદોદ જિ.નર્મદા) એ ગત તારીખ 15 જૂનનાં રોજ પોતાની બહેનનાં ઘરે સજવા ગામે અથાણા નાખવા માટેની કેરી લેવા માટે ગયો હતો.

જોકે કેરી લઇને રાત્રીનાં 10 વાગ્યાનાં સુમારે ઊંચાદ ગામે પરત આવ્યો હતો. જેથી પતિને મોડા આવવા બાબતે પત્ની હિરલબેને ઠપકો આપતા મનમાં લાગી આવતા તારીખ 16 જૂનનાં રોજ સવારે સુમારે ઝેરી દવા પી લીધી હતી ત્યારબાદ તેણે સારવાર માટે રાજપીપળા સરકારી દવાખાનામાં દાખલ કરવામાં આવ્યો હતો. જોકે સારવાર દરમિયાન અલ્પેશભાઇ તડવીનું મોત થતાં પોલીસે અકસ્માત મોત દાખલ કરી વધુ તપાસ હાથ ધરી છે.