નવસરીનાં મરોલી-વેસ્મા રોડનાં ડાભેલ ગામમાં લારીવાળા પાસે ઉધારમાં દાણા ચણા લેવા બાબતે થયેલા ઝઘડામાં બે પડોશીઓ વચ્ચે ઉગ્ર બોલાચાલી થયા બાદ એક બીજા પર હુમલો કરી ગંભીર ઈજા પહોંચાડ્યાની ફરિયાદ મરોલી પોલીસ સ્ટેશનમાં નોંધાઇ હતી. મળતી માહિતી મુજબ, જલાલપોર તાલુકાનાં મરોલીથી વેસ્મા જવાના રોડના ડાભેલ ગામના કવચીયા ફળિયામાં રાત્રીનાં સમયે લારી વાળો દાણા ચણા વેચવા માટે આવ્યો હતો. જે દિનેશભાઈ રમણભાઈ હળપતિના ઘર આંગણે ઉભો રહ્યો હતો.

ત્યારે મેહુલ મોહન હળપતિએ આવીને લારી વાળા પાસે ઉધારમાં દાણા ચણાની માંગણી કરી હતી. જેનો લારી વાળાએ આપવાનો ઈન્કાર કરતા બંને વચ્ચે બોલાચાલી થઈ હતી. આ વખતે ઘરના આંગણામાં ચાલતા ઝઘડાના કારણે દિનેશભાઈએ આવીને મેહુલને બોલાચાલી કરવા ના પાડી હતી. આ ઝઘડો વધુ ઉગ્ર બનતા ઉશ્કેરાયેલા દિનેશ હળપતિ અને મેહુલે એક બીજા ઉપર લાકડાના ફટકા વડે હુમલો કર્યો હતો. જેમાં માથાના ભાગે લાકડાનો ફટકો વાગતા તે અર્ધબેભાન થઇ જતા તેને સારવાર માટે સુરત નવી સિવિલ હોસ્પિટલમાં દાખલ કરવામાં આવ્યો હતો. બનાવ અંગે મરોલી પોલીસે બંને પક્ષોની ફરિયાદ લઇ કાયદેસરની કાર્યવાહી હાથ ધરી હતી.