વલસાડનાં પારડી તાલુકાનાં ઉમરસાડી ગામે પરિવારમાં દિયરે ભાભી સાથે કારણ વગર ઝઘડો કરી લાકડાનાં ફટકા મારતાં ભાભીએ હોસ્પિટલનાં બિછાને દિયર સામે પારડી પોલીસ મથકે ફોજદારી નોંધાવી હતી. સુત્રો પાસેથી મળતી માહિતી મુજબ, ઉમરસાડી માંગેલવાડ ખાતે રહેતા આશાબેન શૈલેષભાઈ માંગેલાએ વલસાડ સીવીલ હોસ્પિટલના બિછાને પારડી પોલીસને ફરિયાદ નોંધાવી હતી.

જેમાં વર્ણવ્યા પ્રમાણે તારીખ ૩નાં રોજ પતિ બહાર ગયેલ હોય તે સમયે દિયર જયેશભાઈ ઘરમાં મોટે બોલી ઝઘડો કરવા લાગ્યો હતો. તેથી આશાબેને દિયર જયેશને કારણ વગર બોલાચાલી કરવા નાં કહેતા જયેશ એકદમ ઉશ્કેરાઈ ગયો હતો અને ઘરમાં પડેલ લાકડું હાથમાં ધારણ કરી આશાબેન ડાબા હાથ તેમજ ડાબા પગના ભાગે ઉપરાછાપરી ફટકા મારી ગંભીર ઈજા પહોંચાડી હતી. આશાબેન બુમાબુમ કરતા આજુબાજુના લોકો દોડી આવી તેમને વધુ મારથી બચાવ્યા હતા. ઘવાયેલા આશાબેનને પડોશી અનિલભાઈ માંગેલા તેમની કારમાં વલસાડ સિવિલમાં લઈ જે દાખલ કરી હતી.