ગાંધીનગર શહેરનાં ઇન્ફોસિટી પાસે કારનો કાચ તોડી રૂપિયા 12 લાખ રોકડા ઉઠાવી જવાની ઘટના સામે આવી છે. ઘટના અંગે ઇન્ફોસિટી પોલીસે સ્થળ ઉપર પહોંચી તપાસ શરૂ કરી હતી. મળતી માહિતી મુજબ, સેક્ટર-2માં રહેતા અને મૂળ તલોદનાં સલાટપુર ગામનાં રહેવાસી સંજયભાઈ રબારી આંગડિયા પેઢીમાંથી રૂપિયા 12 લાખ ઉપાડીને નિત્યક્રમ મુજબ ઇન્ફોસિટી ખાતે આવેલી ચાની લારી ઉપર મિત્રો સાથે બેસવા માટે ગયા હતા. તે દરમિયાન બાઈક ઉપર આવેલા તસ્કરો કારનો કાચ તોડી 12  લાખ રૂપિયા ભરેલો થેલો ચોરી ફરાર થઈ ગયા હતા.

જોકે સંજયભાઈને આ ઘટના અંગે જાણ થતા આસપાસનાં વિસ્તારમાં તપાસ કરી હતી. પરંતુ ચોરી કરનાર તસ્કરોનો કોઈ જ  પતો લાગ્યો ન હતો. ઘટના અંગે ઇન્ફોસિટી પોલીસને જાણ કરવામાં આવતા પોલીસ સ્થળ ઉપર પહોંચી હતી અને તેમની રજૂઆતને પગલે તસ્કરોને શોધવા માટે કવાયત શરૂ કરી હતી તેમજ આસપાસનાં વિસ્તારના CCTV ફૂટેજની પણ પોલીસ દ્વારા તપાસ કરવામાં આવી રહી છે.