ગાંધીનગરનાં કલોલ હાઇવે પર રાત્રીનાં સમયે સામસામે બે બાઈક અથડાયા હતા. જે અકસ્માતમાં એકનું મોત નિપજ્યું હતું, જ્યારે એક ઘાયલ થતાં સારવાર માટે હોસ્પિટલ ખસેડાયા હતા. સુત્રો પાસેથી મળી માહિતી અનુસાર, કલોલ સીંદબાદ બ્રિજ પાસે આવેલી સોસાયટીમાં રહેતા વિનોદભાઈ શાહ સ્વામિનારાયણ મંદિર સામેના સવસ રોડ પર પસાર થઈ રહ્યા હતા. આ દરમિયાન સામેથી આવતું બાઇક ધડાકાભેર ટકરાયું હતું. બંને બાઇક સામસામે ટકરાતા વિનોદભાઈ શાહનું ઘટના સ્થળે મોત થયું હતું.

જ્યારે અન્ય બાઇક ચાલક તેજસ નાયકને માથામાં ગંભીર ઇજા થઇ હતી. અકસ્માતની ઘટનાને પગલે એમ્બ્યુલન્સનો કાફલો ઘટના સ્થળે દોડી આવ્યો હતો. ઘાયલને સારવાર માટે કલોલની રેફરલ હોસ્પિટલમાં ખસેડવામાં આવ્યા હતા. જોકે ગંભીર ઇજા થતાં વધુ સારવાર અર્થે અમદાવાદ સિવિલ રિફર કરવામાં આવ્યા છે. અકસ્માત અંગે પોલીસે મૃતકનાં પત્નીની ફરિયાદને આધારે આગળની કાર્યવાહી હાથ ધરી છે.