ગાંધીનગર શહેર નજીક આવેલા પોર ગામમાં રહેતો યુવક તેની પત્નિ સાથે બાઇક ઉપર અડાલજથી પોર ગામ તરફ જઇ રહ્યો હતો. તે સમયે ડમ્પરનાં ચાલકે તેના બાઇકને અડફેટે લીધું હતું અને સામેથી આવતા અન્ય એક બાઇકને પણ ટક્કર મારી હતી. આ અકસ્માતમાં ઘાયલ ત્રણેયને સિવિલ ખસેડવામાં આવ્યા હતા. જે પૈકી યુવાનનું મોત થયું હતું. બનાવ અંગે અડાલજ પોલીસે ગુનો દાખલ કરીને વધુ તપાસ શરૂ કરી હતી. મળતી માહિતી અનુસાર, પોર ગામમાં રહેતા કિશન કનુભાઇ દંતાણી ગઇકાલે તેમની પત્નિ સાથે મોપેડ ઉપર નાસ્તો લેવા માટે ગયા હતા અને આ સમયે તેનો નાનો ભાઇ અજય અને તેની પત્નિ કાજલ પણ બાઇક ઉપર સાથે ગયા હતા અડાલજમાં નાસ્તો કરીને તેઓ પરત આવી રહ્યા હતા.

તે સમયે પોર ગામની સીમમાં ઇંટોના ભઠ્ઠા નજીક અજયનું બાઇક પસાર થઇ રહ્યું હતું તે દરમ્યાન પાછળથી ટ્રકે બાઇકને અડફેટે લીધું હતું અને તેના કારણે અજય અને તેની પત્નિ નીચે પટકાયા હતા આ અકસ્માત છતા ટ્રક ઉભો રહ્યો ન હતો અને અન્ય એક બાઇક સવારને અડફેટે લીધો હતો. અકસ્માતને પગલે ટ્રક ચાલક ટ્રકને ત્યાં જ મુકીને નાસી છુટયો હતો બીજીબાજુ આ અકસ્માતમાં ઘાયલોને 108 એમ્બ્યુલન્સ મારફતે ગાંધીનગર સિવિલ ખસેડવામાં આવ્યા હતા જે દરમ્યાન અજયનું મોત નિપજ્યું હતું. ઘટના અંગે અડાલજ પોલીસે ગુનો દાખલ કરીને વધુ તપાસ શરૂ કરી હતી.