ઇસરોએ મંગળવારે અહીં ઇસરો ટેલિમેટ્રી, ટ્રેકિંગ અને કમાન્ડ નેટવર્ક (ઇસ્ટ્રેક)થી ચંદ્રયાન-૩ અવકાશયાનના પાંચમા ભ્રમણકક્ષામાં (પૃથ્વી-બાઉન્ડ પેરીજી ફાયરિંગ) સફળતાપૂર્વક પ્રવેશ્યું હોવાની માહિતી જાહેર કરી હતી.ઈસરોએ જણાવ્યુ છે કે અવકાશયાન ૧૨૭૬૦૯ કિમી૨૩૬ કિમીની ભ્રમણકક્ષા હાંસલ કરે તેવી અપેક્ષા છે. અવલોકનો પછી ભ્રમણકક્ષાની પુષ્ટિ કરવામાં આવશે.

આગામી ફાયરિંગ, ટ્રાન્સલુનર ઇન્જેક્શન (ટીએલઆઇ) ૧ ઓગસ્ટ, ૨૦૨૩ના રોજ મધ્યરાત્રિના ૧૨થી ૧ વાગ્યાની (ભારતીય સમય) વચ્ચે આયોજન કરવામાં આવ્યું છે.ઇસરોના એક અધિકારીએ જણાવ્યું હતું કે,ટીએલઆઇ પછી ચંદ્રયાન-૩ પૃથ્વીની ભ્રમણકક્ષા છોડશે અને પછી ૧ ઓગસ્ટે ચંદ્ર તરફ તેની મુસાફરી શરૂ કરશે.ઈસરોએ કહ્યું છે કે તે ૨૩ ઓગસ્ટે ચંદ્રની સપાટી પર લેન્ડરનું સોફ્ટ લેન્ડિંગ કરવાનો પ્રયાસ કરશે. ઇસરોએ ૧૪ જુલાઈના રોજ ચંદ્રયાન-૩ લોન્ચ કર્યું હતું.