નર્મદા જિલ્લાનાં સાગબારામાં વીજકંપનીની ગંભીર બેદરકારી સામે આવી હતી જેમાં જીવંત વીજવાયર તૂટી પડતાં એકની ઈજા પહોંચી હતી. સુત્રો પાસેથી મળતી માહિતી મુજબ, સાગબારાનાં સીમની પાદર ગામનાં ધારાસિંગ મનજી વસાવા (ઉ.વ.૫૦, રહે.સીમનીપાદર, તા.સાગબારા, જિ.નર્મદા) ગત તારીખ ૧૧/૧૧/૨૦૨૪નાં સવારનાં આશરે સાડા સાતેક વાગ્યાનાં અરસામાં મોટરસાઈકલ ઉપર બેસીને પોતાના ઘરેથી સાગબારા જઈ રહ્યા હતા. તે વખતે વીજ થાંભલા ઉપરથી તુટીને રસ્તા ઉપર પડેલા જીવંત વીજતાર ઉપરથી તેમની મોટર સાયકલ પસાર થતા વીજકરંટ લાગતાં તેઓ મોટર સાઈકલ ઉપરથી પડી ગયા હતા અને તેમને માથાનાં ભાગે તથા ગળામાં ઈજા થઈ હતી. જોકે આ ઘટનામાં તેમનો આબાદ બચાવ થયો હતો.