અંકલેશ્વર-હાંસોટને જોડાતા દાંડી હેરિટેજ નેશનલ હાઇવે માર્ગ પર અકસ્માત ઝોન એવા કડકિયા કોલેજ આમલાખાડી બ્રિજ ટર્નીંગ પર શુક્રવારની વહેલી પરોઢે વધુ એક ગંભીર અકસ્માત સર્જાયો હતો. વહેલી પરોઢે 5: 30 વાગ્યાનાં અરસામાં સુરત પાર્સિંગની કાર અંકલેશ્વરથી હાંસોટ તરફ જઈ રહી હતી. તે સમયે સામેથી વડોદરા પાર્સિંગની કારની હાંસોટથી અંકલેશ્વર તરફ આવી રહી હતી તે દરમિયાન આમલાખાડી બ્રિજ નજીકનાં ટર્ન પર બંને કાર ધડાકાભેર સામસામે ભટકાઈ હતી અને કારનો ખુરદો બોલવાની સાથે એક કાર રોડ સાઈડમાં નીચે ખાબકી હતી. તો બીજી કાર રોડ સાઈડ પર લટકી પડી હતી. જોકે બંને કારમાં બેઠેલા 4થી વધુ લોકોને ઇજા પહોંચી હતી.