અંકલેશ્વર શહેર એ ડિવિઝન પોલીસે ભાતવાડ વિસ્તારમાં આવેલા શિવગંગા એપાર્ટમેન્ટનાં પાર્કિંગમાં મુકેલી ઇકોવાનમાંથી ઇંગ્લીશ દારૂનો જથ્થો ઝડપી પાડ્યો હતો. જોકે પોલીસે ભરૂચનાં એક બુટલેગરને ઝડપી પાડી રૂપિયા 3.28 લાખનો મુદ્દામાલ ઝડપી પાડી 2 વોન્ટેડ આરોપીને ઝડપી પાડવાની કાર્યવાહી હાથ ધરી હતી. બનાવની વિગત એવી છે કે, અંકલેશ્વર શહેર પોલીસ મથકનો સર્વેલન્સ સ્કોર્ડનાં સ્ટાફને માહિતી મળી હતી કે, અંકલેશ્વર પીરામણ નાકાથી સુરતી ભાગોળ ભાતવાડ તરફ જતા માર્ગ પર આવેલા શિવ-ગંગા એપાર્ટમેન્ટ આગળ ઇકો કારમાં વિપુલ દારૂનો જથ્થો લઈ ભરૂચનો ઈસમ આવ્યો છે.

જે માહિતીનાં આધારે પોલીસની ટીમે શિવ-ગંગા એપાર્ટમેન્ટનાં પાર્કિંગમાં સર્ચ કરતા ભરૂચ ભઠીયાર વાડમાં રહેતા ઝુબેર રિયાઝ કુરેશી ઇકો લઇ ઉભો હતો. તેને શંકાનાં આધારે ઇકો ગાડીમાં સર્ચ કરતા દારૂની 160 બોટલ મળી આવી હતી. આમ, પોલીસે કુલ રૂપિયા 16,000/-નો દારૂનો જથ્થો તેમજ રૂપિયા 12,000/-નાં બે મોબાઈલ અને ઇકો કાર મળી કુલ રૂપિયા 3.28 લાખનો મુદ્દામાલ જપ્ત કર્યો હતો. તેમજ ઝુબેર કુરેશીની ધરપકડ કરી શિવ ગંગા એપાર્ટમેન્ટ ખાતે રહેતો તૌફીક કુરેશી નામનો ઈસમ ફરાર થઇ જતાં પોલીસે તેને વોન્ટેડ જાહેર કર્યો હતો.