ભરૂચનાં ડભાલી કોઠી ગામે રહેતી એક સગર્ભા તેમના ઘર પાસે બાંધેલાં બકરાઓની ગંદકી પાણી નાંખી સાફ કરી રહ્યાં હતાં. તે સમયે તેમની પાડોશીએ તમે ‘ગંદુ પાણી અમારી તરફ ફેંકો છો’ કહીં તકરાર કરી હતી. ત્યારબાદ તેનું ઉપરાંણુ લઇ ચાર જણાએ સગર્ભા પર હૂમલો કરી ગંભીર ઇજાઓ પહોંચાડી હતી. બનાવ અંગે નબીપુર પોલીસે ગુનો નોંધી આગળની કાર્યવાહી હાથ ધરી હતી.

સુત્રો પાસેથી મળતી માહિતી અનુસાર, ભરૂચમાં આવેલ ડભાલી કોઠી ગામે રહેતાં માધવ હિંમત વસાવાએ પોલીસ મથકે ફરિયાદ આપતા જણાવ્યું હતું કે, તેમના પુત્ર રવિન્દ્રની પત્ની કાજલ સવારનાં સમયે તેમના ઘરના બાંધેલાં બકરાઓની ગંદકી પાણી નાંખી સાફ કરી રહી હતી. તે સમયે વરસાદ પણ થોડો ચાલી રહ્યો હતો.

જોકે તે દરમિયાન તેમના બાજુમાં રહેતાં કુંટુંબિક ભાઇની વહુ સોમી વિઠ્ઠલ વસાવાએ તેને અપશબ્દો ઉચ્ચારી તમે અમારા ઘર પાસે કેમ, ‘ગંદુ પાણી કાઢો છો’ તેમ કહીં તેને માર મારી હતી. કાજલ સગર્ભા હોવા છતાં તેને માર માર્યો હતો. સોમીનું ઉપરાણું લઇને વિઠ્ઠલ ચતુર વસાવા, સંદિપ વિઠ્ઠલ વસાવા, વનિતા સંદિપ વસાવાએ દોડી આવતી તેઓએ પણ પરિવાર પર હૂમલો કર્યો હતો. ઘટનામાં સગર્ભા કાજલની હાલત લથડતાં તેને તાત્કાલિક સારવાર માટે ભરૂચની સિવિલ હોસ્પિટલમાં ખસેડી હતી.