અમદાવાદનાં વસ્ત્રાલમાં એસ.પી.રિંગ રોડ ઉપર માધવ ફાર્મ પાસે શિવમ આવાસ ખાતે રહેતા અને રિક્ષા ચલાવીને પરિવારનું ગુજરાન ચલાવતા દિનેશભાઇ નવલસિંહ રાઠોડ (ઉ.વ.43) ગતરોજ રાત્રે લાગે રિક્ષામાં પેસેન્જર બેસાડીને ઓઢવ રિંગ રોડ ઉપર પાંજરાપોળ સર્કલ પાસેથી પસાર થતા હતા. તે સમયે પૂરઝડપે આવી રહેલ બોલેરો કારનાં ચાલકે પોતાના વાહન પરનો સ્ટેરીંગ પરનો કાબુ ગુમાવી બેસતા રિક્ષાને જોરદાર ટક્કર મારી હતી.

જેના કારણે રિક્ષા પલટી જતાં રિક્ષા ચાલકને કપાળ તથા બંને પગે અને હાથે ગંભીર ઇજાઓ થતાં સારવાર માટે સિવિલ હોસ્પિટલમાં દાખલ કરવામાં આવ્યા હતા. જ્યાં મોડી રાતે ફરજ પરના ડોકટરે મૃત જાહેર કર્યા હતા. જોકે આ અકસ્માતમાં રિક્ષા બેઠેલા પેસેન્જર નિલેશભાઇને પણ ગંભીર ઇજા થઇ હતી. જોકે અકસ્માત સર્જી બોલેરો ચાલક નાસી ગયો હતો. બનાવ અંગે ટ્રાફિક આઇ ડિવિઝન પોલીસે બોલેરોનાં નંબર આધારે શોધખોળ હાથ ધરી હતી.