ડાંગ જિલ્લાનાં આહવા તાલુકાનાં વાસુર્ણા ગામમાં એક મહિલાનું મોત ઝેરી દવા પીને નહીં પરંતુ પતિએ મારતા થયું હોવાનો પોલીસ તપાતમાં પર્દાફાશ થતાં પતિની ધરપકડ કરાઈ હતી. ગત તારીખ ૨૬ નાંરોજ આહવા તાલુકાના વાસુર્ણા ગામ ખાતે રહેતા દક્ષાબેન અરવિદભાઈ ગાવિતની કોઈ અગમ્ય કારણોસર ઝેરી દવા પી લઈ મરણ ગયેલી હાલતમાં લાશ મળી આવેલી હોવાનું જણાઈ આવ્યું હતું. અકસ્માત મોતનો ગુનો દાખલ કરી આહવા પોલીસ મથકના પી.આઈ. અને પી.એસ.આઈ.ની ટીમે પોસ્ટપાર્ટમ સહિતની કામગીરી હાથ ધરી હતી.

ત્યારબાદ તારીખ ૨૮/૧૨/૨૦૨૪ નાંરોજ નજરે જોનાર વ્યક્તિની પૂછપરછ દરમિયાન તથા મરણ જનારની પી.એમ. નોટ પરથી જાણવા મળ્યું હતું કે, અરવિંદભાઈ સીતારામભાઈ ગાવિત અને પત્ની દક્ષાબેન વચ્ચે કોઈ બાબતે ઝઘડો તકરાર થયો હતો. જેમાં પતિ અરવિંદભાઈએ પત્ની દક્ષાને હાથથી માર માર્યો હતો અને માથાનાં અંદરનાં ભાગે નાની મોટી ગંભીર ઈજા પહોંચાડી હતી. ત્યારે તેણીનું મોત નીપજ્યું હતું. ત્યારે આહવા પોલીસ સ્ટેશનનાં પો.ઈ. દ્વારા અલગ-અલગ ટીમો બનાવી હ્યુમન સોર્સિસની મદદથી આરોપીને પકડી પાડવા ચક્રો ગતિમાન કર્યા હતા. પી.એસ.આઈ. અને ટીમે સંયુક્ત કામગીરી કરી આરોપી અરવિંદભાઈ સિતારામભાઈ ગાવિતની અટકાયત કરી હતી અને આગળની કાર્યવાહી હાથ ધરી હતી.