વાલોડના સ્યાદલા ગામના નવાગાળા ફળિયામાં બાજીપુરા સુમુલ ડેરીથી મઢી ગામ તરફ જતાં રસ્તા પર અજાણ્યા વાહણ ચાલકે વૃદ્ધ રાહદારીને ટક્કર મારતા વૃદ્ધનું સારવાર દરમિયાન મોત નિપજ્યું હતું. બનાવ અંગે પોલીસે ગુન્હો નોંધી તપાસ હાથ ધરી હતી. મળતી માહિતી મુજબ, વ્યારાના બોરખડી ગામના પહાડી ફળિયામાં રહેતા ગોવિંદભાઈ ચોગડાભાઈ ચૌધરી (ઉ.વ.૭૧)નાઓ ગત તારીખ ૨૦/૦૧/૨૦૨૫ નારોજ સાંજના સમયે બાજીપુરા સુમુલડેરીથી મઢી ગામ તરફ જતાં રસ્તા પર ચાલતા ચાલતા જતા હતા.

તે સમયે સ્યાદલા ગામે નવાગાળા ફળિયામાં રસ્તા પર તેમને કોઈ અજાણ્યા વાહન ચાલકે પોતાનું કબ્જાનું વાહન પુરઝડપે અને ગફલતભરી રીતે હંકારી લાવી રાહદારી ગોવિંદભાઈને ટક્કર મારી અકસ્માત સર્જાયો હતો. જોકે આ અકસ્માતમાં ગોવિંદભાઈને માથામાં ગંભીર ઈજા તથા ડાબા હાથે હથેળીના ભાગે તેમજ ડાબા પગે ફેકચર પહોંચતા તેમનું સારવાર દરમિયાન મોત નિપજ્યું હતું. બનાવ અંગે ચંપકભાઈ જાનુભાઈ ચૌધરી નાએ વાલોડ પોલીસ મથકે તારીખ ૨૧/૦૧/૨૦૨૫ નારોજ અજાણ્યા વાહન ચાલક સામે ગુન્હો નોંધાવતા પોલીસે ગુન્હો નોંધી કાયદેસરની કાર્યવાહી હાથ ધરી હતી.