ગ્રેટર નોઈડાથી એક દુઃખદ સમાચાર સામે આવ્યા છે.  નોઈડાથી ગ્રેટર નોઈડાને જોડતા એક્સપ્રેસ વે પર આજે સવારે એક ગોઝારો અકસ્માત સર્જાયો હતો. જેમાં પાંચ લોકોના ઘટના સ્થળે જ મૃત્યુ થઈ જતાં માહોલ ગમગીન થઇ ગયો હતો. મૃતકોમાં 3 મહિલા અને બે પુરૂષો સામેલ હોવાની જાણકારી મળી છે. માહિતી મળતાં જ નોલેજ પાર્ક પોલીસ સ્ટેશનની ટીમ ઘટના સ્થળે પહોંચી હતી. પોલીસે તમામના મૃતદેહને કબજામાં લઈ પોસ્ટમોર્ટમ માટે મોકલી આપ્યા છે. આ ઘટના બાદ મૃતકના પરિવારમાં આક્રંદ છવાઈ ગયો હતો.

અકસ્માત થવાનું કારણ પણ કાર ચાલકને ઝોંકુ આવી ગયું હોવાનું મનાઇ રહ્યું છે. આ અકસ્માત સેક્ટર-146 મેટ્રો સ્ટેશન પાસે થયો હતો. મૃતકોમાં સામેલ તમામ લોકો એક કારમાં જઈ રહ્યા હતા. જ્યારે વહેલી સવારે કારચાલકે નોઈડા એક્સપ્રેસ વેની બાજુમાં ઉભેલી ટ્રકને ટક્કર મારી દીધી. જેમાં તમામ 5 લોકોના મોત થયા હતા. માહિતી મળતાં જ પોલીસ ઘટના સ્થળે પહોંચી હતી. ઘટના બાદ ક્ષતિગ્રસ્ત બંને વાહનોને નોઈડા એક્સપ્રેસ વે પરથી હટાવી લેવામાં આવ્યા હતા. ઘટના અંગે નોલેજ પાર્ક પોલીસ સ્ટેશને આગળની કાર્યવાહી હાથ ધરી હતી.