મૂળ ડાંગ જિલ્લાના આહવા તાલુકાના સેંદ્રીઆંબા ગામનો વતની વિશાલ દેવસ્યાભાઈ સાહરે (ઉ.વ. ૧૮) હાલમાં સાયણ-સિવાણ રોડ ઉપર આવેલા યુરો ટેક્સ્ટાઈલ પાર્કમાં હરિકૃષ્ણ ઈન્ડસ્ટ્રીઝ કંપનીની રૂમમાં રહેતો હતો. જોકે વિશાલ આ કંપનીમાં વોટરજેટ મશીન ચલાવવાનું કામ કરતો હતો. વિશાલે ગત સોમવારે મોડી સાંજે અગમ્ય કારણોસર ઈન્ડસ્ટ્રીઝના ચોથા માળે આવેલી તેની રૂમમાં લોખંડના એંગલ સાથે ગ્રે-કાપડથી ગળે બાંધી ફાંસો ખાઈ આપઘાત કર્યો હતો. જયારે વિશાલને બેભાન હાલતમાં સાયણની જીવનરક્ષા હોસ્પિટલમાં સારવાર અર્થે લાવવામાં આવ્યો હતો. જ્યાં તબીબે વિશાલને તપાસી મૃત જાહેર કર્યો હતો. આ બાબતની જાણ મૃતક યુવકના વતનના નીતિન ચંદુભાઈ ભોયે ઓલપાડ પોલીસ મથકમાં કરી હતી. પોલીસે હાલ તો અકસ્માત મોતનો ગુનો નોંધી આગળની વધુ તપાસ હાથ ધરી હતી.