વલસાડનાં અંજલાવ ગામે વીજતાર તૂટી પડ્યો હોવાની બાબતથી અજાણ ૨૮ વર્ષીય યુવાન તેના ખેતરમાં કામ કરવા માટે ગયો હતો તે દરમિયાન યુવાનનો સંપર્ક તે તૂટી પડેલા વીજતાર સાથે થતાં તેને જોરદાર કરંટ લાગ્યો હતો. ત્યારબાદ તેનું મોત થયું હતું. સુત્રો પાસેથી મળતી માહિતી મુજબ, અંજલાવ ગામનાં ચાર રસ્તા પાસે રહેતા ક્રિષ્નરાજ દિલીપભાઈ પટેલ (ઉ.વ.૨૮) ખેતી કરી ગુજરાન ચલાવતો હતો. ક્રિષ્નરાજ રવિવારે સવારે ૯.૩૦ વાગ્યે ખેતરમાં કામ કરવા માટે ગયો હતો. ખેતર પાસે વીજ લાઈનનો એક વાયર તૂટી પડયો હતો. જે બાબતથી અજાણ ક્રિષ્નરાજ અકસ્માતે વીજ તારના સંપર્કમાં આવતા તેને કરંટ લાગ્યો હતો. આ સાથે જ તે સ્થળ પર બેભાન થઈ ગયો હતો. સ્થળ પર દોડી આવેલા સ્થાનિક રહીશોએ ઘટનાની જાણ મૃતકના પરિજનોને કરી હતી. ત્યારબાદ યુવાનને સારવાર માટે પારનેરા સ્થિત હોસ્પિટલમાં લઇ જવાયો હતો. જ્યાં ફરજ પરના તબીબે ક્રિષ્નારાજને મૃત જાહેર કર્યો હતો.