ભરૂચનાં ઝઘડિયા તાલુકામાંથી પસાર થતા નેશનલ હાઇવે પર માંડવા પાટિયા પાસે કોઇ અજાણ્યા વાહનની અડફેટે બાઇક ચાલકનું મોત નીપજ્યું હતું. બનાવ અંગે ઝઘડિયા પોલીસમાં ફરિયાદ નોંધાતાં પોલીસે ગુનો નોંધી તપાસ શરૂ કરી છે. મળતી માહિતી અનુસાર, અંકલેશ્વર તાલુકાનાં નવાકાંસિયા ગામનો મહેન્દ્ર વસાવા ગત તારીખ 23નાં રોજ બાઇક લઇને માંડવા ગામ તરફથી મુલદ ચોકડી તરફ નેશનલ હાઇવે પર જઇ રહ્યો હતો. તે સમયે માંડવા પાટિયા નજીક કોઇ અજાણ્યા વાહને તેને અડફેટમાં લેતા અકસ્માત સર્જાયો હતો. ગંભીર રીતે ઇજાગ્રસ્ત થયેલ મહેન્દ્રનું ઘટના સ્થળે જ મોત નીપજ્યું હતું. ઘટના બાદ અકસ્માત સર્જી અજાણ્યો વાહન ચાલક તેનું વાહન લઇને ભાગી છૂટયો હતો. મૃતકના ભાઇ પંકજ વસાવાએ ઝઘડિયા પોલીસમાં ફરિયાદ નોંધાવતા પોલીસે તપાસ શરૂ કરી છે.