સુરત શહેરના પુણા સીતાનગર ચોકડી પાસે નશામાં યુવક અર્ધનગ્ન થઈ સિટી બસ સામે ઉભો રહ્યો હતો. ઘટના અંગે પોલીસે નશો કરી હંગામો કરવા બદલ ગુનો નોંધી ધરપકડ કરી હતી. મળતી માહિતી મુજબ,  યોગી ચોક રૂટની સીટી બસ નંબર 403 પૂણા ગામ સીતાનગર ચોકડી પાસેથી પસાર થઈ રહી હતી. તે સમયે અચાનક એક અર્ધનગ્ન યુવક ધસી આવ્યો હતો અને બસ આગળ ઉભા રહી બસને રોકી દેતાં ડ્રાઇવરે બસ રોકી દેવાની ફરજ પડી હતી. જયારે ગમેતેવા ચેડા કર્યા બાદ બાદ યુવક બસ આગળ રોડ પર જ સૂઇ ગયો હતો.

બસ આગળ અર્ધનગ્ન યુવક સૂઇ જતાં ટ્રાફિક જામ થયો હતો. જોકે આ તમાશાને લઈ મોટી સંખ્યામાં ટોળું ભેગું થયું હતું. લોકોએ તેને હટાવવાનો પ્રયાસ કર્યો હતો. પરંતુ તે ગમેતેમ વર્તન કરતો હોઈ ટોળાંમાંથી કોઈએ પોલીસને કોલ કરતાં પૂણા પોલીસની પી.સી.આર. વાન ત્યાં ધસી ગઈ હતી. તેમજ આ પીધેલ શખ્સને વાનમાં નાંખી ટ્રાફિક ક્લીયર કરાવ્યો હતો. પોલીસ મથકે લવાયેલાં યુવકની પૂછપરછમાં તેનું નામ નયન રમેશ હીરપરા (રહે.તુલસી દર્શન સોસાયટી, યોગીચોક) હોવાનું બહાર આવ્યું હતું. જયારે નશામાં આ કૃત્ય કરવાનું તેણે પોલીસ સમક્ષ કબુલ કર્યું હતું. પોલીસે તેની વિરુદ્ધ નશો કરી હંગામો કરવા બદલ ગુનો નોંધી ધરપકડ કરી હતી.