ગુજરાત વિધાનસભા ચૂંટણીની મતગણતરી ચાલી રહી છે. તાજેતરના વલણો અનુસાર, ભાજપ 155 બેઠકો પર આગળ છે. જ્યારે કોંગ્રેસ 18, AAP 5 અને અન્ય 3 સીટો પર આગળ છે. ચૂંટણી પંચના જણાવ્યા અનુસાર ભાજપે 5 બેઠકો જીતી છે. ગુજરાત વિધાનસભા ચૂંટણી 2022માં ભાજપને અત્યાર સુધીમાં લગભગ 52 ટકા વોટ મળ્યા છે. જયારે કોંગ્રેસને 27 અને આમ આદમી પાર્ટીને લગભગ 13 ટકા વોટ મળ્યા હતા. જો કે આટલા વોટ શેર સાથે આમ આદમી પાર્ટીએ સૌને ચોંકાવી દીધા છે. ગુજરાત વિધાનસભાની ચૂંટણીમાં ભાજપ રેકોર્ડ સંખ્યામાં બેઠકો જીતવા માટે તૈયાર છે. પાર્ટીની નજર 1985માં કોંગ્રેસે જીતેલી 149 બેઠકોના રેકોર્ડ પર પણ ટકેલી છે.

ગુજરાતના ગૃહમંત્રી હર્ષ સંઘવીએ જણાવ્યું હતું કે, ઘણા વર્ષોથી વિપક્ષે ગુજરાતની જમીન અને લોકોને બદનામ કરવામાં કોઈ કસર છોડી નથી. આજે ફરી જનતાએ આ પ્રમાણપત્ર આપ્યું છે કે ગુજરાતની જનતા અને ભાજપ વિશ્વની શ્રેષ્ઠ જોડી છે. આ ચૂંટણીમાં પણ વિપક્ષોએ મારી આ ધરતીને બદનામ કરવામાં કોઈ કસર છોડી ન હતી અને જનતાએ જવાબ આપવામાં કોઈ કસર નથી છોડી. જનતાનો જનાદેશ સ્પષ્ટ કરે છે કે ગુજરાત અને દેશને તોડનારાઓ માટે કોઈ સ્થાન નથી.

ગુજરાત વિધાનસભા ચૂંટણી 2022ના પરિણામો અંગે કેન્દ્રીય મંત્રી હરદીપ સિંહ પુરીએ કહ્યું કે આ વ્યાપક રૂપે અપેક્ષિત હતું. વડાપ્રધાનના નેતૃત્વમાં ભાજપ જે પ્રકારનું વિકાસ આધારિત કામ કરી રહ્યું છે તેનું આ વાસ્તવિક સ્વરૂપ છે. તે સમગ્ર દેશ માટે એક મોડેલ છે.

ગુજરાત ભાજપના મહામંત્રી પ્રદીપસિંહ વાઘેલાએ કહ્યું કે ગુજરાતમાં ફરી એકવાર પીએમ મોદીની વિકાસની રાજનીતિની જીત થઈ છે. હું રાજ્યની જનતાનો આભાર માનું છું. કેન્દ્રીય મંત્રી નરેન્દ્ર સિંહ તોમરે કહ્યું કે ભાજપ વિકાસની રાજનીતિમાં માને છે. આપણા વડાપ્રધાન સબકા સાથ, સબકા વિકાસના સિદ્ધાંત પર કામ કરે છે. હું સમજું છું કે ગુજરાતમાં જે વલણ ચાલી રહ્યું છે તે વડાપ્રધાન નરેન્દ્ર મોદીની સકારાત્મક નીતિઓનું પરિણામ છે.કેન્દ્રીય મંત્રી અર્જુન રામ મેઘવાલે કહ્યું કે દિલ્હી ગુજરાતમાં ભાજપની જીતનું કારણ સુશાસન અને વિકાસ છે. લોકોને સુરક્ષા મળી છે. કાયદો અને વ્યવસ્થા સુધરી છે અને વિકાસ થયો છે તો લોકોને સારું લાગે છે. ગુજરાતમાં આજે ઈતિહાસ રચાવા જઈ રહ્યો છે.

સંસદીય બાબતોના મંત્રી પ્રહલાદ જોશીએ જણાવ્યું હતું કે ગુજરાત મોડલને 2000-2001થી લોકો દ્વારા સમર્થન અને સ્વીકારવામાં આવી રહ્યું છે. અમે જે મોડલ દેશ સમક્ષ રજૂ કરી રહ્યા છીએ તેનો સ્વીકાર કરવામાં આવી રહ્યો છે. હું ગુજરાતની જનતા અને ભાજપને અભિનંદન આપું છું. મતદાનના ઈતિહાસમાં આ અત્યાર સુધીનો સૌથી મોટો રેકોર્ડ છે.

ગુજરાતમાં વિધાનસભાની ચૂંટણીમાં કોંગ્રેસનું પ્રદર્શન ખૂબ જ નિરાશાજનક રહ્યું હતું. તે સત્તા વિરોધી લહેરનો ફાયદો ઉઠાવી શકી નથી. સ્થિતિ એવી છે કે કોંગ્રેસને 60 બેઠકોનું નુકશાન થયું છે, જયારે ભાજપને લગભગ એટલી જ બેઠકોનો ફાયદો થયો છે.