હિન્દુ ધર્મમાં હોળાષ્ટકને અશુભ માનવામાં આવે છે. આ દરમિયાન શુભ અને માંગલિક કાર્ય કરવાની મનાઈ હોય છે. ધાર્મિક માન્યતાઓ અનુસાર હોળાષ્ટક સમયે વ્યક્તિ શુભ કાર્ય કરે છે તો જીવનમાં અનેક પ્રકારની મુશ્કેલીઓનો સામનો કરવો પડી શકે છે. માનવામાં આવે છે કે, હોળાષ્ટક દરમિયાન તમે સારા કામ કરો છો તો અનેક વિઘ્નો આવી શકે છે. હોળાષ્ટકમાં શુભ કાર્ય કરવા પર પૂર્ણરૂપે વર્જિત હોય છે. તો જાણો હોળાષ્ટક ક્યારથી શરૂ થશે. આ સાથે જાણો હોળાષ્ટકમાં કયા કાર્યો ન કરવા જોઈએ અને હોળાષ્ટક શું છે તેની સાથે શું છે પૌરાણિક કથા શું છે તે જાણીએ.

ફાગણ માસની શરૂઆત થઈ ચૂકી છે. જોકે તારીખ 6 માર્ચ એટેલે કે આવતીકાલે ગુરુવારે પંચાંગ અનુસાર જોઈએ તો ફાગણ સુદ સાતમથી હોળાષ્ટક પ્રારંભ થશે. હોળા+અષ્ટક એટલે આઠ દિવસનો સમય જેને સામી હોળી કે સામી ઝાળનો સમય રહેવાથી શાસ્ત્રોનાંમત અનુસાર આવા સમયમાં તમામ શુભ-માંગલિક કાર્યો, મૂહુર્ત, ઉદ્ઘાટન કાર્યો કરવા માટે નિષેધ માનવામાં આવે છે, કારણ કે સામી હોળીના તરંગો સામે આવવાથી શુભ કે માંગલિક સફળ થતા નથી.

હોળાષ્ટક એટલે શું...

હિંદુ ધર્મમાં હોળીના તહેવારનું વિશેષ મહત્ત્વ છે. હોળી ફાગણ મહિનાની પૂનમના દિવસે ઉજવવામાં આવે છે. પરંતુ હોળાષ્ટક ફાગણ મહિનાના શુક્લ પક્ષની અષ્ટમીથી જ જોવા શરૂ થઇ જાય છે. હોળાષ્ટક હોળી અને અષ્ટક શબ્દોથી બનેલો છે એટલે કે હોળીના આઠ દિવસ. સમગ્ર દેશમાં ફાગણ મહિનાની પૂનમ પર હોલિકા દહન કરવામાં આવે છે, તેથી હોળાષ્ટક હોળીના આઠ દિવસ પહેલાં જ લાગી જાય છે.

હોળાષ્ટકની પૌરાણિક કથા...

હોળાષ્ટક પાછળની પૌરાણિક વાત પણ છે, જેમાં જણાવવામાં આવ્યું છે કે, હિરણ્યકશ્યપે પોતાના પુત્ર નારાયણ ભક્ત પ્રહલાદથી નારાજ થયા હતા. તેમણે પ્રહલાદને મારવા માટે પૂનમનો દિવસ પસંદ કર્યો. પૂનમના દિવસથી આઠ દિવસ પહેલાં તેના નિર્દય પિતાએ ત્રાસ આપવાનું શરૂ કર્યું જેથી તે ડરમાં પિતાનો ભક્ત બની જાય છે, પરંતુ પ્રહલાદ તેની ભક્તિથી ડગતો નથી. આઠમાં દિવસે હિરણ્યકશ્યપની બહેન હોલિકા પ્રહલાદ તેના ખોળામાં બેસાડીને મારવાની કોશિશ કરી હતી પરંતુ ભક્ત પ્રહલાદના વાળ પણ વાંકા થયા ન હતા. હોલિકા સળગીને રાખ થઇ ગઈ હતી. માન્યતાઓ છે કે, પૂનમનાં આઠ દિવસ પહેલાં જ્યારે ભક્ત પ્રહલાદે ત્રાસ સહન કર્યો તેને હોળાષ્ટક કહેવામાં આવે છે, તેથી આ કારણોસર આ દિવસોમાં શુભ કાર્ય કરવાની મનાઈ છે.

માંગલિક કાર્યો કેમ નથી થતાં...

હોળાષ્ટકના દિવસોમાં મોટાભાગના ગ્રહોની સ્થિતિ ઉગ્ર હોય છે. ઉગ્ર ગ્રહોના યોગમાં જ્યોતિષીઓ દ્વારા શુભ કાર્ય ન કરવાની સલાહ આપવામાં આવે છે. તો બીજી તરફ એવું માનવામાં આવે છે કે, ગ્રહોની અશુભ સ્થિતિમાં જો કામ શરૂ કરવામાં આવે તો ઘણી સમસ્યાઓનો સામનો કરવો પડે છે. નાનાં કાર્યોમાં પણ મોટી સમસ્યાઓનો સામનો કરે છે. સફળતા સરળતાથી પ્રાપ્ત થતી નથી, કેટલીકવાર કરવામાં આવેલ કામ પણ બગડે છે જેના કારણે હોળાષ્ટકનાં દિવસોમાં શુભ કામ કરવાનું ટાળવું જોઈએ.

હોળાષ્ટકનાં દિવસોમાં સુખ-સમૃદ્ધિ માટે આ ઉપાયો કરો...

સંતાનપ્રાપ્તિનો ઉપાય જો કોઈ કપલ નિઃસંતાન હોય તો તેઓએ લાડુ ગોપાલના વિધિ-વિધાન સાથે હોળાષ્ટક દરમિયાન પૂજા-પાઠ કરવા જોઈએ. આ સમય દરમિયાન હવનમાં શુદ્ધ ગાય ઘી અને ખાંડનો ઉપયોગ કરો. આ ઉપાય લેવાથી નિઃસંતાનને પણ બાળકો મળે છે.

કરિયરમાં સફળતા માટે જો તમે કરિયરમાં સફળતા મેળવવા માંગતા હોવ તો હોળાષ્ટકમાં આ ઉપાય કરો. ઘરે અથવા ઓફિસમાં જવ તલ અને ખાંડ સાથે હવન કરો. આમ કરવાથી તમારી કરિયરમાં આવતા તમામ અવરોધો દૂર થઈ જશે. તમે જે પણ ક્ષેત્રમાં કામ કરવાનું શરૂ કરો છો તેમાં તમે સરળતાથી સફળતા મેળવી શકશો.

સારા સ્વાસ્થ્ય માટે હોળાષ્ટકમાં મહામૃત્યુંજય મંત્રનો જાપ કરવો જોઈએ. આ જાપ કર્યા પછી ગુગળથી હવન કરવાનું ભૂલશો નહીં. માન્યતા અનુસાર, આમ કરવાથી વ્યક્તિને અસાધ્ય રોગથી મુક્તિ મળે છે.

ધન પ્રાપ્તિ માટે જે લોકો આર્થિક રીતે નબળા હોય તે લોકોએ હોળાષ્ટકમાં આ ઉપાય જરૂર કરવા જોઈએ. કનેરનાં ફૂલો સાથે સરસવ અને ગોળથી હવન કરવો જોઈએ. આમ કરવાથી પૈસાથી સંબંધિત તમામ સમસ્યાઓ દૂર થઈ જશે. એટલું જ નહીં, સંપત્તિ સંબંધિત બાબતોમાં પણ લાભ થશે.

આમ, તારીખ 14 માર્ચ શુક્રવાર સાંજે 06:51થી ગ્રહમંડળના રાજાદી સૂર્ય ગ્રહ મીન રાશિમાં સતત એક મહિનો ભ્રમણ કરવાથી ‘મીનારક’ કમૂરતા રહેશે. તારીખ 13 એપ્રિલ સુધી તમામ શુભ માંગલિક કાર્યો કરી શકાશે નહીં. પરંતુ હા આવા સમયમાં સત્યનારાયણ ભગવાનની કથા, શિવજીનો રુદ્રાભિષેક નવગ્રહ નડતર નિવારણ પૂજા, અશુભ યોગોની શાંતિ કર્મ, રાંદલના લોટા તથા બ્રહ્મભોજન કે દાન દક્ષિણા અંગેના કાર્યો કરી શકાશે.