ભરૂચ અને નર્મદા જિલ્લામાં વરસી રહેલાં ભારે વરસાદનાં પગલે ભુંડવા ખાડીના પુલ પર વરસાદી પાણી ફરી વળતાં સ્ટેચ્યુ ઓફ યુનિટીને જોડતો માર્ગ 5 કલાક સુધી વાહન વ્યવહાર માટે બંધ થઇ ગયો હતો. ભરૂચ જિલ્લામાં મુશળધાર વરસાદને લઇને ઠેર ઠેર માર્ગો પર પાણી ભરાતા ઘણા માર્ગ બંધ કરાયા છે.

જોકે ગતરોજ ઝઘડિયા તાલુકાનાં રાજપારડી નજીક અંકલેશ્વર રાજપલા વચ્ચેના ધોરીમાર્ગ પર ભુંડવા ખાડીના નાળા પરથી પાણી ફરી વળતાં સ્ટેચ્યુ ઓફ યુનિટીને જોડતો માર્ગ બંધ થઇ ગયો હતો. રાજપારડી નજીકથી પસાર થતી ભુંડવા ખાડી પરનું નાળુ ખુબ નીચુ હોવાથી ચોમાસામાં વધારે વરસાદ થતાં ઘણીવાર નાળા પરથી પાણી વહેતુ હોય છે.

જયારે પુલ પરથી પાણી વહેતાં હોવાથી બંને તરફ વાહનોની કતાર લાગી ગઇ હતી. નાળાની સામે પાર અટવાયેલા કેટલાક રાહદારીઓ રેલવે ટ્રેક પર થઇને જતા આવતા નજરે પડતા હતાં. ​​​​​​​ભુંડવા ખાડીના આ નાળા પરનો તેમજ બંને તરફનો માર્ગ કેટલાક સમયથી મોટા પ્રમાણમાં ધોવાઇ ગયો છે.