વાલોડ નગર ખાતેથી પસાર થતી વાલ્મિકી છેલ્લા બે દિવસથી ભયજનક સપાટીએ પસાર થઈ રહી છે, જે દરમિયાન સોમવારે વાલોડમાં બે ઇંચ વરસાદ તેમજ ઉપરવાસમાં વધારે વરસાદના કારણે વાલ્મિકી નદીમાં ઘોડાપૂર આવી ગયું હતું. વાલ્મિકી નદીના ઘોડાપૂરના પગલે વાલોડ નગરના પુલ ફળિયામાં વાલ્મિકી નદીના પાણી ઘૂસી જતા પુલ ફળિયાનાં લોકો ભારે મુશ્કેલીમાં મુકાઈ ગયા હતા. સાંજના સમયે ઘરમાં પાણીમાં ભરાવાના કારણે ઘરવખરી અને અનાજ સહિત સર સામાનને નુકસાન થયું હતું.

વાલોડ વહીવટી વિભાગને જાણ થતા તાત્કાલિક ઘટના સ્થળે આવી પુલ ફળિયાના 25 પરિવારોને સ્થળાંતર કરી નજીક આવેલા આંબેડકર ભવન સ્કૂલમાં તથા શોપિંગ સેન્ટરમાં રોકાવામાં આવ્યા હતા. વાલ્મિકીમાં પાણીનું સ્તર વધી રહેતા લોકોમાં ભયનો માહોલ ઉભો થયો છે. વાલોડ મામલતદાર જયેશભાઈ પટેલ, પી.એસ. આઇ એન. જે. પંચાલ, તાલુકા વિકાસ અધિકારી હરદીપ સિંહ ધરિયા સહિત, સરપંચ વિજયાબેન નાઈક, સ્થાનિક જનસેવા ટ્રસ્ટ અને સેવાકીય યુવાનો કાર્યમાં જોડાયા હતા.