પારડીના બાલદા ગામે આવેલ રાખુબા ફાર્મમાં ગત માસમાં એક દીપડો આવીને પાર નદી કિનારે કોઢારમાં બાંધેલ ગાયોમાંથી એક વાછરડાનું મારણ કરી ફરાર થઈ ગયો હતો. ત્યારબાદ ગત ૧૯ ફેબ્રુઆરીની રાતે દીપડો ફરી રખુબા ફાર્મમાં પાર નદી કિનારે બનાવેલા કોઢાર પાસે આવ્યો હતો અને તેણે એક વાછરડાને ફાડી ખાધુ હતુ. આ ઉપરાંત બે દિવસ પૂર્વે જન્મેલ એક વાછરડાને ખેંચી ગયો હતો. સવારે વાછરડુંનું મારણ જોઈ ત્યાં કામ કરતાં લોકોમાં ભયનો માહોલ ફેલાઈ ગયો હતો. ઘટનાની જાણ થતાં ગ્રામજનોમાં પણ ફફડાટ ફેલાયો છે. બનાવ અંગે પારડી ફોરેસ્ટ વિભાગને જાણ કરાતા કર્મચારીઓ ઘટના સ્થળે આવી પહોંચી દીપડાને પાંજરે પુરવા માટે પાંજરૂ ગોઠવ્યું હતું.