ઉમરગામ સંજાણ રોડ પર ગતરોજ બપોરના અરસામાં બે બાઈક સામ-સામે અથડાતા સ્થાનિક બે યુવકના મોત નીપજ્યા હતા. બનાવ અંગે બંને યુવકના ગામમાં ગમગીન છવાઈ ગયો હતો. ઉમરગામ સંજાણ રોડ ઉપર પ્રકાશ સ્ટીલેજ કંપનીથી થોડે આગળ ચીરાખાડી પાસે ગતરોજ બપોરેના સમયે અઢી વાગ્યાની આસપાસ માર્ગ ઉપર બાઇક સામ-સામે અથડાતાં ગંભીર અકસ્માત સર્જાયો હતો અને આ અકસ્માતમાં ઉમરગામ તાલુકાના ટીંભી ગામે કોળીવાડમાં રહેતા હર્ષ મહેશ માછી (ઉ.વ.23)નું ઘટના સ્થળે જ કરૂણ મોત નીપજ્યું હતું. જ્યારે પ્રતીક રાજકિરણ માહયાવંશી (ઉ.વ.20, રહે.દેહરી રામવાડી) ને ગંભીર ઈજા થતાં 108ની મદદથી વાપી હરિયા હોસ્પિટલમાં લઈ જવાયો હતો જ્યાં ફરજ પરના તબીબે એને મૃત જાહેર કર્યો હતો. બનાવ અંગે ઉમરગામ પોલીસ સ્ટેશનમાં ફરિયાદ નોંધાતા પોલીસે અકસ્માત મોતનો ગુનો નોંધી આગળની કાર્યવાહી હાથ ધરી હતી.