વાપી ટાઉનના એક વિસ્તારમાં રહેતી 16 વર્ષીય સગીરા ઘરેથી અચાનક ગુમ થતા તેની માતાએ ચણોદમાં રહેતા એક વિધર્મી સામે અપહરણની ફરિયાદ નોંધાવતા પોલીસે આગળની તપાસ હાથ ધરી હતી. સુત્રો પાસેથી મળતી માહિતી અનુસાર, વાપી ટાઉન વિસ્તારમાં રહેતી એક મહિલા ગત તા.6 નવેમ્બરે નવસારી સબજેલ જવા માટે પોતાના ઘરથી રવાના થઇ હતી અને ત્યારબાદ વાપી બસ ડેપો પહોંચી  તબિયત સારૂ ન લાગતા થોડા સમય બાદ તે નવસારી ન જઇ પરત ઘરે પહોંચી હતી જ્યાં તેની 16 વર્ષીય પુત્રી હાજર ન રહેતા તેની શોધખોળ હાથ ધરી હતી.

પરંતુ આસપાસના વિસ્તારમાં શોધખોળ બાદ પણ કોઇ પત્તો ન લાગતા મહિલા ચણોદમાં રહેતા શંકાસ્પદ યુવકના ઘરે પહોંચી હતી અને તેના ઘરે પણ લોક હોવાથી તે જ તેની પુત્રીને લઇ નાસી ગયા હોવાની શંકાને લઇ બનાવ અંગે ટાઉન પોલીસ મથકમાં મહિલાએ ગુરૂવારે આરોપી અહેમદ હસન મોહંમદ તહસીન સામે પુત્રીને અપહરણ કરી લઇ ગયા બદલ ફરિયાદ નોંધાવી હતી. પોલીસે આરોપી સામે એટ્રોસિટીનો ગુનો દાખલ કરી આગળની તપાસ હાથ ધરી હતી.