વાપીના ડુંગરા વિસ્તારમાં એક વર્ષ પહેલા પાડોશમાં આવેલો ઇસમ સગીરાને પ્રેમજાળમાં ફસાવી તેના પર અવારનવાર દુષ્કર્મ આચરતો હતો જેથી સગીરા ગર્ભવતી થઇ હતી. જેની જાણ યુવકને થતા તે વાપી છોડી વતન બિહાર ખાતે ફરાર થઇ ગયો હતો.

સુત્રો પાસેથી મળતી માહિતી અનુસાર, વાપીના ડુંગરા વિસ્તારમાં રહેતી એક 16 વર્ષીય સગીરાની ઘરની બાજુના મકાનમાં એક યુવક એક વર્ષ પહેલા રહેવા માટે આવ્યો હતો. તે દરમિયાન યુવકે તેને પ્રેમજાળમાં ફસાવી લેતા અવારનવાર તેની સાથે દુષ્કર્મ આચરતો હતો. થોડા સમય બાદ સગીરાને ગર્ભ રહી જતા તેની જાણ સગીરાના પરિજનોને થઇ હતી. બનાવને લઇ સગીરાના પરિજનોએ યુવકને તેની સાથે લગ્ન કરી લેવા જણાવ્યું હતું પરંતુ યુવક તે માટે તૈયાર ન હોય મોકો જોઇ વતન બિહારમાં ફરાર થઇ ગયો હતો. જેથી પીડિતાના પરિવારે બનાવ અંગે ગત તા.11મી સપ્ટેમબરના રોજ ડુંગરા પોલીસ મથકમાં ફરિયાદ નોંધાવતા પોલીસે દુષ્કર્મ અને પોક્સો એક્ટ મુજબનો ગુનો નોંધી ફરાર યુવકને પકડવાની કાર્યવાહી હાથ ધરી હતી.