વલસાડ તાલુકાના ફલધરા ગામે દેવીદાડ ફળિયામાં રહેતા ખેડૂત ઉદય રઘુભાઇ પટેલના માતા કંચનબેન ગત તા.29 સપ્ટેમ્બરના રોજ સાંજે 5.30 વાગ્યે ગામમાં પૂર્ણેશ્વર મંદિરે દર્શન અને પૂજા કરવા ગયા હતા અને ત્યાંથી કંચનબેન સાંજે 7 વાગ્યાના સુમારે મંદિરેથી ઘરે જવા પરત થઇ રહ્યા હતા. તે સમયે  ઘર નજીક પહોંચતા જ પાછળથી પાડોશી યુવક નિકુંજ બાઇક લઇને પુરઝડપે ધસી આવતા વૃધ્ધા કંચનબેનને ટક્કર મારતાં તેઓ રોડ ઉપર પટકાયા હતા. આ અક્સમાતમાં વૃધ્ધાને માથાના ભાગે ગંભીર ઇજા પહોંચતા તેમને ધરમપુર સાંઇનાથ હોસ્પિટલ અને ત્યાંથી સુરતની યુનાઇટેડ હોસ્પિટલમાં આઇસીયુમાં દાખલ કરાયા હતા. જ્યાં ગત તા.1લી ઓક્ટોબરે વૃધ્ધાનું મોત થયું હતું. બનાવ અંગે અડાજણ પોલીસ બાઈક ચાલક વિરૂધ્ધ ફરિયાદ દાખલ કરી વધુ તપાસ હાથ ધરી હતી.