વલસાડનાં સેગવા ગામના રાજપૂત ફળિયામાં રહેતા ભગવાનસિંહ રાઠોડ વલસાડ ખેરગામ રોડ પાસે હાર્ડવેર દુકાન ચલાવી પોતાનું તથા પરિવારનું ગુજરાન ચલાવે છે અને તેમનો 18 વર્ષીય પુત્ર રોહન વલસાડની જી.વી.ડી.સાર્વજનિક હાઈસ્કુલમાં ધોરણ-12માં અભ્યાસ કરતો હતો.

 

 

 

રોહન વલસાડનાં કાપરીયા ગામે મામાનાં ઘરે 2 દિવસ માટે રહેવા ગયો હતો. ત્યારબાદ રોહન સવારે બાઈક નંબર જીજે/15/ડીકે/7128 લઈને પરત સેગવા ગામે આવા માટે નીકળ્યો હતો. તે સમયે વલસાડનાં પીઠાથી કાંજણરણછોડ ગામ તરફ જતા રસ્તા ઉપર આવેલા સારંગપુર ગામના ભય જનક વળાંક પાસેથી પસાર થઈ રહ્યો હતો તે દરમિયાન કાંજણરણછોડ ગામેથી પીઠા તરફ પુરઝડપે અને ગફલતભરી રીતે હંકારી લાવતો ટ્રક નંબર જીજે/06/ટી/7137નાં ચાલકે રોહનની બાઈકને અડફેટે લેતા અકસ્માત સર્જાયો હતો. આ અકસ્માતમાં બાઈક ઉપરથી રોડ ઉપર પટકાયેલો રોહન ટ્રકના પાછળના ટાયર નીચે આવી જતા ગંભીર ઈજા થવાથી તેનું ઘટના સ્થળ પર જ કમકમાટી મોત નીપજ્યું હતું.

 

 

 

આ બનાવમાં મૃતકના સંબંધી રાકેશભાઈ ઠાકોરે અકસ્માત સર્જનાર ટ્રક ચાલક સામે વલસાડ રૂરલ પોલીસ મથકમાં ફરિયાદ નોંધાવતા પોલીસે ગુનો નોંધી આગળની વધુ તપાસ પી.એસ.આઈ. જી.આઈ.રાઠોડે હાથ ધરી હતી.