વડોદરાનાં છાણી જકાતનાકા પાસે એસટી બસમાંથી વિકલાંગ દંપતી ઉતરતા હતા તે સમયે કન્ડક્ટરની બેદરકારીના પગલે અકસ્માત સર્જાયો હતો. બેલ વાગતા ડ્રાઈવરે ગાડી હંકારતા બસમાંથી ઊતરી રહેલા વિકલાંગ દંપતી પૈકી પત્નીને ઇજા પહોંચતા સારવાર અર્થે સયાજી હોસ્પિટલ ખસેડવામાં આવી હતી.

સુત્રો પાસેથી મળતી માહિતી અનુસાર, વડોદરા શહેરના નવાયાર્ડ વિસ્તારમાં રહેતા મીનાબેન મકવાણા અને તેમના પતિ દિનેશભાઈ મકવાણા બંને વિકલાંગ છે. 1લી ઓગસ્ટના રોજ તેઓ બોરસદ ખાતે સબંધીના ખબર અંતર પૂછવા માટે ગયા હતા. જ્યાંથી બીજા દિવસે પરત વડોદરા માટે બોરસદ બસ સ્ટેશન ખાતેથી એસટી બસમાં મુસાફરી કરી રહ્યા હતા. તે દરમિયાન છાણી જકાતનાકા પાસે બસ ઉભી રહેતા દિનેશભાઈ પહેલા ઉતર્યા હતા. ત્યારબાદ કન્ડક્ટરે બેલ મારતા મીનાબેને જણાવ્યું હતું કે, હું અપંગ છું નીચે ઉતરતા સમય લાગશે. તેમ છતાં મીનાબેન નીચે ઉતરતા સમયે કંડક્ટરે બેદરકારી દાખવી બેલ વગાડતા ડ્રાઈવરે બસ હંકારી હતી. જેથી મીનાબેને બસમાંથી જમીન પર પટકાયા હતા. આ અકસ્માતમાં મીનાબેનને થાપાના ભાગે ફ્રેક્ચર તથા શરીરે ઈજાઓ પહોંચી હતી. બનાવ અંગે ફતેગંજ પોલીસ મથકે ફરિયાદ નોંધાવી હતી.