હવામાન વિભાગની કમોસમી વરસાદની આગાહી વચ્ચે તાપી જિલ્લામાં પણ સવારથી વાતાવરણમાં પલટો જોવા મળી રહ્યો છે. અહીં ઠંડા પવન સાથે વરસાદ વરસી રહ્યો છે. ઘનઘોર વાદળોના કારણે વિઝિબિલિટી પણ ઘટી ગઈ હતી,વિઝિબિલિટી ઘટતા વ્યારા નગરમાંથી પસાર થતા વાહનોમાં દિવસે હેડ લાઇટ કરવાની ફરજ પડી છે.

રાજ્યમાં વહેલી સવારથી કમોસમી વરસાદ વરસી રહ્યો છે,ઠેર ઠેર માવઠાના કારણે નુકસાનીના દ્રશ્યો પણ સામે આવી રહ્યાં છે, આ બધાની વચ્ચે હવે તાપી જિલ્લામાંથી વધુ એક મોટા સમાચાર સામે આવ્યા છે,, સોનગઢના ખાંભલા ગામે નિશાળ ફળીયામાં રહેતા અર્જુનભાઈ ગંજીભાઈ ગામીત (ઉ.વ.૫૨) પોતાના ખેતરમાં  ભાતના પુળીયા ઢાંકતા હતા તે દરમિયાન અચાનક કડાકા ભડાકા સાથે અર્જુનભાઈ ગામીતના ઉપર વીજળી પડતા તેઓ શરીરે ડાબીબાજુના ખભાથી નીચે સુધી દાઝી જતા મોત નિપજ્યું હતું.સોનગઢમાં ભારે પવનના કારણે ઠેકઠેકાણે વૃક્ષ અને વીજ પોલ ધરાશાયી થયા હતા,જયારે વ્યારામાં વિજપુરવઠો ખોરવાઇ ગયો હતો.

સોનગઢના ગણેશનગર વિસ્તારમાં એક વૃક્ષ ધરાશાય થયું હતું તથા વીજપોલ નમી પડ્યું હતું,જોકે આ મામલે સોનગઢ નગર પાલિકાને જાણ કરવામાં આવતા ફાયર ટીમના જવાનો અને વીજળી શાખા તેમજ આરોગ્ય સહકારી ટીમેં સ્થળ પર પહોંચી પડેલા વૃક્ષોને વાયરો પરથી કાપી,નમી પડેલા વિજપોલને નીચે પાડ્યા હતા.

સમગ્ર તાપી જિલ્લો આજે પાણી પાણી થઇ ગયો હતો.જિલ્લાના જુદાજુદા વિસ્તારોમાં વરસાદ ખાબકી જતા વાડી ખેતરો છલોછલ થયા હતા,વૃક્ષો ધરાશાયી થયા હતા.વિજ પુરવઠો ખોરવાયો હતો.કમોસમી વરસાદથી શિયાળુ પાકને વ્યાપક નુકશાન થવાની ભીંતી છે. કમોસમી વરસાદે અહી ખાનાખરાબી વેરી હતી.

નિઝર- ૦૯ મીમી

ઉચ્છલ- ૦૦ મીમી

સોનગઢ- ૨૬ મીમી

વ્યારા – ૧૩ મીમી

વાલોડ – ૧૩ મીમી

કુકરમુંડા – ૦૯ મીમી

ડોલવણ _ ૨૩ મીમી