ડાંગ જિલ્લાનાં વાતાવરણમાં અચાનક પલટો આવ્યો હતો અને જેના કારણે જિલ્લામાં ઠંડક પસરી ગઈ હતી. ભારતીય હવામાન વિભાગ દ્વારા દક્ષિણ ગુજરાતનાં જિલ્લાઓમાં આવનાર બે થી ત્રણ દિવસ માટે કમોસમી માવઠા અને 40 કિલોમીટરની પ્રતિ ઝડપે પવનનાં સુસવાટાની આગાહી કરી છે. હવામાન વિભાગની આગાહી મુજબ ડાંગ જિલ્લાનાં ગિરિમથક સાપુતારા, આહવા, વઘઇ અને સુબીર સહિત પૂર્વપટ્ટી અને સરહદીય પંથકમાં વાદળછાયુ વાતાવરણ છવાતા પંથકમાં શીતલહેર વ્યાપી ગઇ હતી.

ડાંગ જિલ્લામાં વાતાવરણનાં પલટાનાં કારણે ડાંગી ખેડૂતોની ચિંતામાં વધારો નોંધાયો છે. ગિરિમથક સાપુતારામાં વાતાવરણમાં પલટો આવતા જોવાલાયક સ્થળોનું વાતાવરણ આહલાદક બની ગયું હતું. થોડા દિવસ પૂર્વે ડાંગ જિલ્લાનાં ગામોમાં સતત ત્રણ દિવસ સુધી પડેલ માવઠાનાં પગલે ડાંગી ખેડૂતોને જંગી નુકસાન થયુ હતું. ત્યારે ફરીવાર ડાંગ જિલ્લાનાં ગામોમાં વાદળછાયું વાતાવરણ સર્જાતા ખેડૂતોને પાકને નુકસાન થવાની અને આર્થિક સ્થિતિ કથળવાનાં એંધાણ વર્તાઈ રહ્યા છે.