અમદાવાદના વસ્ત્રાપુરમાં રહેતા વેપારી મોપેડ લઇને હીરાવાડી નજીકથી પસાર થતા હતા. આ સમયે લૂંટારુ ગેંગે તેમનો પીછો કરીને તેમના મોપેડને ટક્કર મારી હતી અને તેમની પાસેથી રૂપિયા બે લાખ રોકડ ભરેલ થેલાની લૂંટ ચલાવી હતી. બનાવ અંગે કૃષ્ણનગર પોલીસે ગુનો નોંધી વધુ તપાસ હાથ ધરી છે. બનાવની વિગત એવી છે કે, વસ્ત્રાપુર વિસ્તારમાં રહેતા યુવકે કૃષ્ણનગર પોલીસ સ્ટેશનમાં અજાણ્યા ચાર બાઇક ચાલકો સામે ફરિયાદ નોંધાવી છે કે, બે દિવસ પહેલા તેઓ મોપેડ લઇને ધંધાના કામે જઇ રહ્યા હતા. મોપેડ લઇને કાલુપુરથી વોરાના રોઝા થઇને બાપુનગર ગયા હતા અને ત્યાંથી તેઓ હીરાવાડી તરફ જતા હતા.

તે સમયે નંબર પ્લેટ વગરની બાઇક લઇને ચાર શખ્સો તેમનો પીછો કરતા હતા ભર બપોરે તેઓ ફોજદારની ચાલી પાસેથી પસાર થતા હતા આ સમયે તેઓએ તેમના મોપેડને ટક્કર મારી હતી અને આગળ બે પગ વચ્ચે મુકેલી કેરી બેગની લૂંટ ચલાવી નાસી ગયા હતા બેગમાં રોકડા રૂપિયા 2 લાખ અને જરૂરી દસ્તાવેજ હતા. આ બનાવ અંગે કૃષ્ણનગર પોલીસે ગુનો નોંધી આસપાસ વિસ્તારના સીસીટીવી કેમેરાના ફૂટેજ આધારે વધુ તપાસ હાથ ધરી છે.