ઉકાઈ નજીકના સીલેટવેલ ગામનો રાહુલ ગામીત (ઉ.વ.૨૦) ઉકાઈની જે.કે. પેપર મીલમાં કામદાર તરીકે નોકરી કરતો હતો. જોકે ગત તારીખ ૧૪ના રોજ બપોરે તે પેપર મિલના એક પેકેજીંગ પેપર (બોર્ડ) બનાવવાના નવા મશીન પર કામ કરતો હતો. ત્યારે તુટી ગયેલા બોર્ડ પેપરને હાઈ પ્રેશરવાળા બે રોલર વચ્ચે પાસ કરાવવા જતા અચાનક ફરતા રોલર વચ્ચે તેના બંને હાથ આવી જતા ખભા સુધી કચડાઈ ગયો હતો. તેને તુરંત સુરતની ખાનગી હોસ્પિટલમાં ખસેડાયો હતો. ત્યાં તેના બંને હાથ કાપી સારવાર ચાલુ કરવામાં આવી છે. જોકે રાહુલ ગામીતના હાથમાં ઈન્ફેક્શન વધતુ હોવાનું જાણવા મળ્યું છે તેમજ યુવકની હાલત પણ ગંભીર છે.