ચીખલી તાલુકાના ખુડવેલ ચોકડી અને સાદકપોર ચાડિયા ફળિયા એમ બે અલગ અલગ સ્થળે અકસ્માતના બનાવમાં બે યુવકોનાં મોત નીપજતા અરેરાટી વ્યાપી છે. ૨૦૨૫ નવા વર્ષની શરૂઆતમાં જ રોડ અકસ્માતોનો સિલસિલો શરૂ થઈ ગયો છે. અને ગત વર્ષની માફક જ યથાવત રહ્યો છે. ચીખલી તાલુકાના ખુડવેલ ચોકડી અને સાદકપોર ચાડિયા ફળિયા પાસે બે કલાકના સમયગાળામાં જ બે અલગ અલગ અકસ્માતમાં બે શ્રમજીવી યુવકોનાં મોત નીપજ્યા છે. પ્રાપ્ત માહિતી અનુસાર તાલુકાના કણભઈ દેસાઈ ફળિયા ખાતે રહેતા અનિલભાઈ ધીરુભાઈ પટેલ (ઉ.વ.૩૨) તેના મિત્ર સુભાષભાઈ ઉત્તમભાઈ હળપતિ (ઉ.વ.૨૪) બાઈક નંબર જીજે/૧૫/એજી/૪૮૪૪ ઉપર કામકાજ અર્થે રાનકુવા તરફ જઈ રહ્યા હતા.

આ દરમિયાન તાલુકાના ખુડવેલ ચોકડી પાસે ટ્રક નંબર ટીએન/૫૨/એડી/૧૨૬૭ન ચાલકે પોતાના કબજાની ટ્રક પુરઝડપે અને ગફલતભરી રીતે હંકારતા બાઈકને ટક્કર મારતા મોટરસાઈકલ ઉપર બેસેલી સુભાષ ઉત્તમભાઈ હળપતિ રોડ ઉપર પટકાતા ટ્રકનું ટાયર ફરી વળતા તેનું સ્થળ ઉપર જ મોત નીપજ્યું હતું. જ્યારે બાઈક ચાલક અનીલ પટેલને ઈજા થતા સારવાર લેવાની નોબત આવી હતી. બનાવ અંગેની ફરિયાદ અનિલ ધીરુભાઈ પટેલે પોલીસ મથકે આપતા પોલીસે ટ્રક ચાલક રામાચંદ્રન વેકટચલમ (રહે.ડી ૭-૬ કતાવાલઉ ઓડીવિરાનુંર પોસ્ટ ઓમલુર, જિ.સાલીમ, તમિલનાડુ) વિરુદ્ધ ગુનો નોંધી પોલીસે કાયદેસરની કાર્યવાહી હાથ ધરી હતી.

જ્યારે અન્ય એક બનાવમાં થાલા ગૌચરણ ફળિયા ખાતે રહેતા નિકુંજ રાજુભાઈ હળપતિ (ઉ. વ.૨૩) હોન્ડા સીડી ડીલક્સ નંબર જીજે/૨૧/એમ/૭૬૭૩ લઈને ખેરગામ તરફ જઈ રહ્યા હતા ત્યારે ચીખલી ખેરગામ રોડ ઉપર આવેલા સાદકપોર ચાડિયા ફળિયા રેખાબેન દશરથભાઈ પટેલના ઘર પાસે સામેથી પુરપાટ ઝડપે આવતી મહેન્દ્ર પીકઅપ જીજે/૨૧/વાય/૦૭૫૯ના ચાલકે ટક્કર મારી અડફેટે લેતા નિકુંજભાઈને માથાના ભાગે ગંભીર ઈજાઓ પહોંચતા તેનું સ્થળ ઉપર જ મોત નીપજ્યું હતું. અકસ્માતના બનાવ અંગેની ફરિયાદ મૃતકના પિતા રાજુભાઈ રવજીભાઈ હળપતિ (ઉ.વ.૪૭, રહે. થાલા ગૌચરણ ફળિયા, તા.ચીખલી)એ પોલીસે મથકે આપતા પોલીસે મહેન્દ્ર પીકઅપના ચાલક સામે ગુનો નોંધ્યો હતો.