સુરતનાં સરથાણા વિસ્તારમાં વહેલી સવારે મોર્નિંગ વોક પર નીકળેલ યુવક વેપારી ઉપર ફાયરીંગ કરી બાઈક પર આવેલા બે અજાણ્યા ફરાર થઈ ગયા હતા. વેપારીને ગોળી ખભામાં વાગતા ગંભીર હાલતમાં હોસ્પિટલમાં ખસેડાયા હતા. બનાવ અંગે જાણ થતાં પોલીસ દોડતી થઈ ગઈ હતી.

સુત્રો પાસેથી મળતી માહિતી અનુસાર, સુરતનાં સરથાણા શ્યામધામ મંદિર નજીક વહેલી સવારે મોર્નિંગ વોક પર નીકળેલ કાપડનાં વેપારી હિરેન મોરડીયા ઉપર બાઈક પર આવેલા બે અજાણ્યાએ ફાયરિંગ કર્યું હતું અને ફરાર થઈ ગયા હતા.

જોકે આ ફાયરિંગમાં ગોળી વેપારીને ખભામાં વાગી હતી અને તે લોહી લુહાણ હાલતમાં નીચે પટકાયા હતા. બનાવને પગલે એકત્ર થયેલા લોકોએ વેપારીને ગંભીર હાલતમાં સારવાર માટે હોસ્પિટલમાં ખસેડયા હતા. બનાવની જાણ થતા સરથાણા પોલીસ દોડતી થઈ ગઈ હતી. પોલીસે સ્થળ પર પહોંચી વધુ તપાસ હાથ ધરી હતી.