સુરત જીલ્લાનાં કોસંબા નજીક ધામરોડ હાઈવે પર મોડી રાત્રે બે કાર ધડકાભેર અથડાતાં બંને કારને મોટું નુકસાન થયું હતું તેમજ બંને કાર ચાલકો સહિત અન્ય લોકોને ગંભીર ઈજા પહોંચી હતી.

મળતી માહિતી મુજબ, કોસંબા પોલીસની હદમાં ધામરોડ પાટીયા પાસે નેશનલ હાઈવે નંબર-૪૮ પર મીના હોટલની સામે અમદાવાદથી મુંબઈ તરફ જતા રોડ પર હોન્ડા એસેન્ટ કાર નંબર એમએચ/૧૨/ઝેડએક/૬૭૮૦નાં ચાલક કેશય મહાદેવ પવાર (રહે.ખંડવા, એમ.પી.)એ ગફલતભરી રીતે હંકારી લાવી હાઈવેનું ડિવાઈડર કુદાવી સામેનાં ટ્રેક પર મારૂતી વાન કાર નંબર જીજે/૧૯/એએમ/૩૮૭૪ સાથે ધડાકાભેર અથડાઈ હતી જેથી મારૂતી વાનમાં સવાર ચાલક રીઝવાન મહરમ અલી (રહે.બારડોલી)નાં બંને પગે તથા કમરના ભાગે ગંભીર ઈજાઓ પહોંચાડતા જેને અંક્લેશ્વર સ્થિત હોસ્પિટલમાં ખસેડવામાં આવ્યો હતો. ત્યારે એસેન્ટ કારના ચાલકને પણ ઈજાગ્રસ્ત હાલતમાં સારવાર માટે ખસેડવામાં આવ્યો હતો. બનાવની જાણ થતા ઘટના સ્થળે પહોંચેલી કોસંબા પોલીસે બંને અકસ્માતગ્રસ્ત વાહનોને સાઈડ પર ખસેડી ટ્રાફિક જામ પરીસ્થિતિ પૂર્વવત કરી હતી. બનાવ અંગે  કોસંબા પોલીસે કારનાં ચાલક વિરુદ્ધ ગુનો નોંધી આગળની તપાસ હાથ ધરી હતી.