કપરાડાનાં માંડવા ગામેથી પૂરઝડપે પસાર થઇ રહેલા એક ટ્રકનાં ચાલકે સામેથી આવી રહેલી બાઇકને ટક્કર મારીને અકસ્માત સજર્યો હતો. જોકે આ અકસ્માતમાં ધરમપુરનાં પીંડવડ ગામનાં બાઈક ચાલક સહિત બાઈક સવાર તેના મિત્રને ગંભીર ઈજા થઈ હતી. ઘટના બાબતની ફરિયાદ કપરાડા પોલીસ મથકમાં નોંધાઈ હતી. સુત્રો પાસેથી મળતી માહિતી મુજબ, ધરમપુરનાં પીંડવડ ગામના મહાર ફળિયામાં રહેતા દિવ્યેશભાઈ ગંગારામભાઈ જાદવ કપરાડા ખાતે આવેલી નિવાસી શાળમાં છેલ્લા 6 વર્ષથી રસોઈયા તરીકે ફરજ બજાવે છે.

તેમની સાથે કપરાડાના વેરી ભવાડા ગામના ખોરી ફળિયામાં રહેતા વિપુલભાઈ ભીખલભાઈ વાઘાત પણ નોકરી કરે છે. બંને બાઈક લઈને માંડવા ગામના વાંગણ ફળિયા પાસેથી પસાર થઈ રહ્યા હતા તે દરમિયાન સામેથી આવી રહેલી ટ્રકના ચાલકે દિવ્યેશભાઈની બાઈકને સામેથી ટક્કર મારીને અકસ્માત સજર્યો હતો. જે અકસ્માતમાં બાઈકસવાર બંને રોડ પાર પટકાતા બંનેને ગંભીર ઈજા થઈ હતી. ઈજાગ્રસ્તોને પ્રથમ સારવાર માટે નાનાપોંઢા સરકારી હોસ્પિટલમાં લઇ જવાયા બાદ વધુ સારવાર માટે ધરમપુરની શ્રીમદ્ રાજચંદ્ર હોસ્પિટલમાં દાખલ કરવામાં આવ્યા છે. જે બાબતે ગંગારામભાઈએ અકસ્માત સર્જી ફરાર થઈ જનાર ટ્રક ચાલક સામે કપરાડા પોલીસ મથકમાં ફરિયાદ નોંધાવતા પોલીસે ગુનો નોંધી વધુ તપાસ હાથ ધરી હતી.