વલસાડનાં સાયેલી નંદન પેટ્રોકેમ લિમિટેડ કંપનીના તેલના ડબ્બા સાથે ગ્રાહકો માટે આવતા કૂપનમાં રૂ.૧૦ રૂપિયાથી લઈને ૨૦૦ રૂપિયા સુધીની ઘણા બધા કૂપન ચોરાઈ ગઈ હતી. તેથી પોલીસે ગુનો નોંધી તપાસ આદરી હતી. દરમિયાન ચોરીની કૂપન પૈકી એક કૂપન ભીવંડી ખાતે સ્કેન કરવામાં આવી હોવાની વિગત મળતા પોલીસ ટીમને ભિવંડી અને મુંબઈ મોકલવામાં આવી હતી.

જ્યાં કૂપન સ્કેન કરવામાં આવ્યું હતું તે લોકોની પૂછપરછ કરાતા એક આરોપી પકડાયો હતો. જેનું નામ કુલદીપ હતુ. તેની પૂછપરછ દરમિયાન જાણવા મળ્યું કે કુલદીપ અગાઉ દાનહની કંપનીમાં કામ કરી ચૂક્યો છે અને તેથી જ તે જાણતો હતો કે આ કૂપનને પૈસામાં કેવી રીતે રૂપાંતરિત કરી શકાય. કુલદીપની પૂછપરછ કરતાં તેણે જણાવ્યું કે તાજેતરમાં કંપનીમાં કામ કરતા શિવકુમારે આ કૂપન ચોરીને તેને મોકલી હતી. જે બાદ શિવકુમાર પણ આ ગુનામાં પકડાઈ ગયો હતો અને તેણે પણ પોતાને ગુનો કબૂલી લીધો હતો. આરોપીઓએ લગભગ ૪,૮૯,૮૫૦ની કૂપન ચોરી હતી. આમ, પોલીસે તેમના કબ્જામાંથી ૮૪ કૂપન તથા રોકડ રિકવર કરી હતી.