સુરત શહેરથી સાયણ માસીના ઘરે આવેલ એક શ્રમજીવી મહિલાનો ત્રણ અજાણ્યા શખ્સોએ મોબાઇલ ફોન ઝુંટવી ફરાર થઈ ગયા હતા. મળતી માહિતી મુજબ, સુરત શહેરના વરીયાળી બજારમાં મદારીવાડના ઘર નં-1335માં ભારતીબેન ભીખુભાઇ રાઠોડ (ઉ.વ.30)રહે છે. તે સુરત અઠવા ગેટ પાસે આવેલ મોંટીસ કીચન રેસ્ટોરન્ટમાં નોકરી કરે છે. ગત તારીખ 28ના રોજ ભારતી રાઠોડ તેની એક્ટીવા મોપેડ સાયણ ડબગર ચાલમાં રહેતી તેની માસી સવિતાબેનના ઘરે પાર્ક કરી સાયણ બજારમાં ખરીદી કરવા ગઈ હતી. તે સમયે ખરીદી પુરી કરી સાયણ રેલ્વે ઓવર બ્રીજની નીચે સાયણ-કઠોર રોડ પરથી મોબાઈલ ફોન ઉપર વાત કરતા-કરતા પગપાળા પસાર થઈ રહી હતી. તે સમયે રોડ ઉપર પાછળથી કાળા કલરની મોપેડ ઉપર આવેલ ત્રણ અજાણ્યા શખ્સો પૈકી મોપેડ પાછળ સવાર ઇસમે ભારતી રાઠોડના હાથમાંથી રૂપિયા 5,000/-ની કિંમતનો મોબાઈલ ફોન ઝુંટવી ત્રણે ભાગી છૂટ્યા હતા. બનાવ અંગે પોલીસે તપાસ હાથ ધરી હતી.