સુરત જિલ્લાનાં કામરેજનાં વિહાણ ગામની સીમમાં સ્કૂલ બસનાં ચાલકે મોપેડને અડફેટમાં લઇ લેતા મોપેડ પર સવાર ત્રણ પૈકી એક મહિલાને ગંભીર ઈજા થઈ હતી. તેનું હોસ્પિટલમાં સારવાર દરિમયાન મોત થયું હતું. પોલીસે તપાસ શરૂ કરી હતી. પોલીસ ફરાર થઈ ગયેલા સ્કૂલ બસ ચાલકને ઝડપી પાડવાના કામગીરી હાથ ધરી હતી. મળતી માહિતી મુજબ, સમીર મુગલે આઝમ અંસારી અને મોનિકાબેન રમેશભાઈ વસાવા અને સુરતાબેન દિનેશભાઈ બારૈયા મોનિકાબેનની મોપેડ લઈને ઉમરપાડા ખાતે લગ્ન પ્રસંગમાં હાજરી આપી પરત સુરત તરફ જઈ રહ્યા હતા.

જે દરમ્યાન વિહાણ ગામની સીમમાં પહોંચતા વિહાનથી સેવણી જતાં રોડ ઉપર સીયાવિલા ફાર્મ નજીક એક અજાણ્યા પીળા કલરની સ્કુલ બસના ચાલકે બસને પુરઝડપે અને ગફલતભરી રીતે હંકારતા મોપેડને અડફેટમાં લીધી હતી આ અકસ્માત બાદ ચાલક સ્કૂલ બસ લઈને ફરાર થઈ ગયો હતો. આ ઘટનામાં મોપેડ પર સવાર ત્રણેયને શરીરે ઈજાઓ પહોંચી હતી. જેથી ત્રણેયને સારવાર અર્થે નજીકની હોસ્પિટલ ખાતે ખસેડવામાં આવ્યા હતા. પરંતુ મોનિકાબેનને માથાનાં તેમજ શરીરનાં વિવિધ ભાગે ગંભીર ઈજા થઈ હોવાથી તેમનું સારવાર દરમ્યાન મોત થયું હતું. ત્યારે સમગ્ર મામલે કામરેજ પોલીસને જાણ કરવામાં આવતા પોલીસે કસુરવાર અજાણ્યા સ્કૂલ બસ ચાલક વિરુદ્ધ ગુનો નોંધી આગળની કાર્યવાહી હાથ ધરી હતી.