ગાંધીનગરનાં ઝુંડાલમાં મોર્નિંગ વોક કરવા માટે નીકળેલી મહિલાના ગળામાંથી બાઈક ઉપર આવેલા બે ચેઈન સ્નેચરો દ્વારા ૯૦ હજારની કિંમતના સોનાના દોરાને ચીલ ઝડપ કરી લેવામાં આવી હતી. બનાવ અંગે અડાલજ પોલીસ મથકમાં ગુનો દાખલ કરવામાં આવ્યો હતો.

મળતી માહિતી મુજબ, ઝુંડાલમાં આવેલી આનંદ વસાહતમાં રહેતા સીમાબેન સત્યપ્રકાશ ગુપ્તા ગત શુક્રવારના રોજ નિત્યક્રમ મુજબ તેમના ઘરેથી મોર્નિંગ વોક કરવા માટે નીકળ્યા હતા તે દરમિયાન આદિત્ય પ્રાઈમ રોડ ઉપર પાછળથી બાઈક ઉપર આવેલા બે ચેઈન સ્નેચરો પૈકી એકે તેમના ગળામાંથી સોનાનો દોરો તોડી લીધો હતો. સીમાબેન દ્વારા બૂમાબૂમ કરવામાં આવી હતી પરંતુ આ ચેઈન સ્નેચર હાથમાં આવ્યા ન હતા. જેમણે મોઢે રૂમાલ બાંધેલો હતો. જેના પગલે તેઓ તુરંત ઘરે દોડી ગયા હતાબનાવ અંગે અડાલજ પોલીસ મથકમાં ફરિયાદ નોંધાવતા પોલીસે ૯૦ હજાર રૂપિયાના સોનાના દોરાની ચોરીનો ગુનો દાખલ કરીને તપાસ શરૂ કરી હતી.