મોરબીના લખધીરપુર રોડ પર પાવર હાઉસ સબ સ્ટેશન નજીકથી શ્રમિક દંપતી પગપાળા ચાલીને કારખાને જતા હતા. ત્યારે ટ્રક ચાલકે પાચળથી પત્નીને ઠોકર મારતા પતિની નજર સામે પત્નીનું કમકમાટીભર્યું મોત નીપજયું હતું. અકસ્માત બાદ પોતાનું વાહન લઈને ટ્રક ટેન્કર ચાલક નાસી ગયો હતો. જયારે માળિયાના દહીંસરા પાસે ટ્રેનની હડફેટે ચડી જતા યુવાનનું મોત થયું હતું. રંગપર ગામે દીવાલ પર પાણી છાંટતી વખતે દીવાલ પરથી નીચે પટકાતા યુવાનનો ભોગ લેવાયો હતો.

જામનગરમાં પ્રૌઢે ગળાફાંસો ખાઈ મોત નિપજાવ્યું હતું. મૂળ મધ્યપ્રદેશના વતની અને હાલ મોરબીના લખધીરપુર રોડ પર ફલોરા સિરામિકમાં રહીને મજુરી કરતા કુન્જીલાલ સંતોષ આહીરવાર અને તેની પત્ની સોનમ આહીરવાર બંને ચાલીને કારખાને કામે જતા હતાં. ત્યારે પાવર હાઉસસબ સ્ટેશન પાસે ટ્રક ટેન્કરના ચાલકે પાછળથી સોનમબેનને ટક્કર મારી હતી. જેથી સોનમબેન પડી જતા ટ્રકનું ટાયર માથા અને છાતીના ભાગે ફરી વળતા ગંભીર ઈજા પહોંચતા સ્થળ પર જ મોત થયું હતું. અકસ્માત બાદ ટ્રક ટેન્કર લઈને ચાલક નાસી ગયો હતો. ઘટના અંગે મોરબી તાલુકા પોલીસે ફરિયાદ નોંધી વધુ તપાસ હાથ ધરી હતી.