આવતીકાલે ગુજરાત વિધાનસભાની ચૂંટણીના બીજા તબક્કાનું મતદાન થવાનું છે ત્યારે બીજા તબક્કામાં મુખ્યમંત્રી ભૂપેન્દ્ર પટેલ (ઘાટલોડિયામાંથી),પાટીદાર નેતા હાર્દિક પટેલ (વિરમગામથી) અને અન્ય પછાત વર્ગ (ઓબીસી)ના નેતા અલ્પેશ ઠાકોર (ગાંધીનગર દક્ષિણમાંથી) અગ્રણી ઉમેદવારો મેદાનમાં છે. હાર્દિક પટેલ અને ઠાકોર બંને ભારતીય જનતા પાર્ટી (BJP)ના ઉમેદવાર છે.

રાજ્યમાં પ્રથમ તબક્કામાં 89 બેઠકો માટે 1 ડિસેમ્બરે મતદાન થયું હતું,જેમાં સૌરાષ્ટ્ર, કચ્છ અને દક્ષિણ ગુજરાતની બેઠકોનો સમાવેશ થાય છે. પ્રથમ તબક્કામાં સરેરાશ 63.31 ટકા મતદાન થયું હતું, જે ગત વખત કરતાં ઓછું હતું. આ ચૂંટણીમાં મુખ્ય મુકાબલો ભાજપ, કોંગ્રેસ અને અરવિંદ કેજરીવાલના નેતૃત્વવાળી આમ આદમી પાર્ટી વચ્ચે હોવાનું માનવામાં આવે છે. બીજા તબક્કાની 93 બેઠકો અમદાવાદ, વડોદરા અને ગાંધીનગર સહિત ઉત્તર અને મધ્ય ગુજરાતના 14 જિલ્લાઓમાં ફેલાયેલી છે. આ વિધાનસભા ક્ષેત્રોમાં 2.54 કરોડ નોંધાયેલા મતદારો છે. 26,409 મતદાન મથકો પર મતદાન યોજાશે અને લગભગ 36,000 ઈલેક્ટ્રોનિક વોટિંગ મશીનનો ઉપયોગ કરવામાં આવશે.

બીજા તબક્કામાં અનેક નેતાઓની પ્રતિષ્ઠા દાવ પર લાગી છે. જેમાં મુખ્યમંત્રી ભૂપેન્દ્ર પટેલની ઘાટલોડિયા બેઠક તેમજ વિરમગામ બેઠકનો સમાવેશ થાય છે જ્યાંથી પાટીદાર નેતા હાર્દિક પટેલ ભાજપની ટિકિટ પર ચૂંટણી લડી રહ્યા છે અને ગાંધીનગર દક્ષિણ બેઠક જ્યાંથી અલ્પેશ ઠાકોર ભાજપના ઉમેદવાર તરીકે ચૂંટણી લડી રહ્યા છે. ચૂંટણી પ્રચારના છેલ્લા દિવસે ઘણા દિગ્ગજો પોતપોતાના પક્ષો માટે પ્રચાર કરતા જોવા મળ્યા હતા. મુખ્ય ચૂંટણી અધિકારી પી ભારતીએ જણાવ્યું હતું કે બીજા તબક્કા માટે નામાંકન પરત ખેંચવાની છેલ્લી તારીખ પછી, હવે કુલ 833 ઉમેદવારો મેદાનમાં છે, જેમાંથી 69 મહિલાઓ અને 764 પુરૂષો છે.

પ્રથમ તબક્કામાં 63.31 ટકા મતદાન નોંધાયું હતું. 2017ની વિધાનસભા ચૂંટણીના પ્રથમ તબક્કામાં 66.75 ટકાથી ઓછું મતદાન થયું હતું. છૂટાછવાયા બનાવોને બાદ કરતાં સામાન્ય રીતે ચૂંટણી શાંતિપૂર્ણ રહી હતી. વડાપ્રધાને શુક્રવારે અમદાવાદમાં રોડ શોનું નેતૃત્વ કર્યું હતું, જે ભાજપના મતે સૌથી મોટો રોડ શો હતો. આ રોડ શો લગભગ 50 કિલોમીટરનો હતો અને શહેરની 13 વિધાનસભા બેઠકોમાંથી પસાર થયો હતો. જેમાં વડાપ્રધાને કોંગ્રેસને પાઠ ભણાવવાનું આહ્વાન કર્યું હતું.

બીજી તરફ, ભારતીય જનતા પાર્ટી, કોંગ્રેસ અને આમ આદમી પાર્ટી ત્રણેય દાવો કરે છે કે તેઓ ગુજરાતમાં સરકાર બનાવવા જઈ રહ્યા છે. શનિવારે ઉત્તર પ્રદેશના મુખ્યમંત્રી યોગી આદિત્યનાથે ગુજરાતને કોંગ્રેસથી મુક્ત કરવા લોકોને અપીલ કરી હતી. તેમણે કહ્યું કે આનાથી તમામ સમસ્યાઓ હલ થઈ જશે.

મુખ્ય ચૂંટણી અધિકારીએ જણાવ્યું હતું કે બીજા તબક્કાના મતદાનના 48 કલાક પહેલા પ્રચાર બંધ કરવા નિયમ મુજબ સાંજે 5 વાગ્યે તે બંધ થઈ ગયું હતું. આ પછી કોઈ પણ અનધિકૃત બહારની વ્યક્તિ મતદાન વિસ્તારોમાં રહેશે નહીં. હવે તમામ ઉમેદવારોએ મતદારોને રીઝવવા ડોર ટુ ડોર સંપર્ક શરૂ કર્યો છે. 5 ડિસેમ્બરે સવારે 8 થી સાંજના 5 વાગ્યા સુધી મતદાન યોજાશે.