US સ્ટેટ ડિપાર્ટમેન્ટનાં પ્રિન્સિપલ ડેપ્યુટી પ્રવક્તા વેદાંત પટેલે જણાવ્યું હતું કે, ભારત સાથેની ભાગીદારી અમેરિકા માટે સૌથી વધુ પરિણામલક્ષી સંબંધો પૈકી એક છે. તેમણે વધુમાં કહ્યું કે વોશિંગ્ટન આર્થિક સંબંધોને વધુ ગાઢ બનાવવા અને સુરક્ષા સહયોગને વિસ્તારવા માટે આતુર છે. વેદાંત પટેલે કહ્યું કે, અમે વડાપ્રધાન નરેન્દ્ર મોદીની રાજ્ય મુલાકાતની યજમાની કરવા માટે ખૂબ જ ઉત્સુક છીએ. રાષ્ટ્રપતિ જો બાયડેન અને ફર્સ્ટ લેડી જીલ બાયડેનના આમંત્રણને પગલે વડાપ્રધાન મોદી તારીખ 22 જૂને અમેરિકાની મુલાકાતે જવાના છે.

તેમણે વધુમાં કહ્યું હતું કે, ભારત સાથેની અમારી ભાગીદારી અમારા સૌથી મહત્વપૂર્ણ ઉત્પાદક સંબંધોમાંની એક છે અને અમે વિવિધ મુદ્દાઓ પર અમારા સહયોગને વધુ ગાઢ બનાવવા માટે આતુર છીએ પછી ભલે તે સુરક્ષા સહયોગ વધારવો હોય, અમારા આર્થિક સંબંધોને વધુ ગાઢ બનાવવો હોય અથવા અમારા વેપાર સંબંધોને વિસ્તૃત કરવા માટે હોય.

વિદેશ મંત્રાલયે એક અખબારી નિવેદન દ્વારા માહિતી આપી હતી કે, વડાપ્રધાન નરેન્દ્ર મોદી તારીખ 22 જૂને અમેરિકાની સત્તાવાર મુલાકાત લેશે. તેમની મુલાકાત દરમિયાન વડાપ્રધાન મોદીની યજમાની US પ્રમુખ જો બાયડેન અને ફર્સ્ટ લેડી જિલ બાયડેન વ્હાઇટ હાઉસ ખાતે સ્ટેટ ડિનરમાં કરવામાં આવશે. અમેરિકી સંસદ દ્વારા જાહેર કરાયેલા એક નિવેદન અનુસાર US કોંગ્રેસે PM મોદીને 22 જૂને અમેરિકાની મુલાકાત દરમિયાન હાઉસ ઓફ રિપ્રેઝન્ટેટિવ્સ અને સેનેટની સંયુક્ત બેઠકને સંબોધિત કરવા આમંત્રણ આપ્યું છે.

ગૃહના સ્પીકર કેવિન મેકકાર્થી, સેનેટના બહુમતી નેતા ચક શૂમર, સેનેટ રિપબ્લિકન નેતા મિચ મેકકોનેલ અને હાઉસ ડેમોક્રેટિક લીડર હકીમ જેફ્રીઝે પીએમ મોદીને પત્ર લખીને કહ્યું છે કે તેમના સંબોધન દરમિયાન તેઓને ભારતના ભવિષ્ય માટે તેમના વિઝનને શેર કરવાની તક મળશે. બંને દેશો સામનો કરી રહેલા વૈશ્વિક પડકારો વિશે વાત કરવાનો અવસર મળશે. વ્હાઇટ હાઉસે કહ્યું કે વડા પ્રધાન નરેન્દ્ર મોદીની US મુલાકાત એ US અને ભારત વચ્ચેની ગાઢ ભાગીદારીને પુનઃપુષ્ટ કરવાની તક હશે.