વડોદરામાં પતિ-પત્ની વચ્ચે નજીવી બાબતે કંકાસ થતા ઉશ્કેરાયેલા પતિએ ગળા ફાંસો ખાઇને આપઘાત કરી લીધો હતો. બનાવ અંગે ફતેગંજ પોલીસે કાયદેસરની કાર્યવાહી હાથ ધરી હતી. સૂત્રો પાસેથી મળતી માહિતી મુજબ, છાણી જકાતનાકા વિસ્તારની આનંદવન સોસાયટીમાં રહેતા ૫૪ વર્ષના તરૂણકુમાર મહેન્દ્રભાઇ પટેલ જી.એસ.એફ.સી.માં ફોરમેન તરીકે નોકરી કરતા હતા.

તેમના બે દીકરાઓ અભ્યાસ કરે છે. જ્યારે પત્ની બેલાબેન ઘરકામ કરે છે. પત્ની સાથે કોઇ બાબતે તેઓને ઉગ્ર બોલાચાલી થઇ હતી. ઝઘડો વધે નહીં તે માટે પત્ની ઘરેથી બહાર નીકળી ગઇ હતી. પરંતુ આવેશમાં આવેલા તરૂણકુમારે દીકરાને કોલ કરીને કહ્યું કે, હું ભગવાનના ઘરે જઉં છું. ત્યારબાદ તેમણે બેડરૂમમાં જઇને ફાંસો ખાઇ લીધો હતો. આ તરફ દીકરો વાઘોડિયા ચોકડી પાસે હતો. તે તરત ઘરે આવ્યો ત્યારે ઘરનો દરવાજો બંધ હતો. મિત્રની મદદથી ઘરનો દરવાજો તોડીને તેણે અંદર જઇને જોતા પિતાએ ફાંસો ખાઇ લીધો હતો. બનાવ અંગે ફતેગંજ પોલીસને જાણ કરવામાં આવતા પોલીસે કાયદેસરની કાર્યવાહી હાથ ધરી હતી.